Shillong, Nailur, 04: Ka Village Defence Primary Committee Nongstoin Area (VDPCNA) ka la pan jingkyrshan na ka Sorkar Jylla ban ïakhun ïa ki kam sniew bad ki kam pyrshah imlang sahlang ha ka thaiñ Nongstoin, West Khasi Hills District.
Ha ka memorandum ba la aiti ha u Myntri ka tnad Social Welfare u Bah Paul Lyngdoh, ka VDPCNA ka la ong ba ka la ïatreilang bad ka tnad Pulit ban pynlong ïa ki jingïaid pahara lang bad ka jingkem ïa ki nongleh kam sniew.
“Watla ngi la pyrshang katba lah, ki katto katne ki kam runar bad ki jingthaw jingkulmar ki dang ïai bteng, kaba buh jingeh ïa ka VDPCNA. Namarkata, da kaba burom ngi wanrah ïa kine ki mat ba phin pyrkhat bad ban kyrpad ïa ka jingkyrshan jong phi, na ka bynta ka jingbha jong ki shnong ki thaw jong ngi bad ka imlang sahlang baroh kawei,” ka la ong.
Ka VDPCNA ka la ai jingmut ruh ban shim katto katne ki lad ki lynti kiba kynthup ban pynkylla ïa ka ophis jong ka Agriculture (Mechanical) sha ka Rehabilitation Centre khnang ban pyndonkam na ka bynta ka jingmyntoi jong ki paidbah.
Ka la kyrpad ïa ka Sorkar ban pynbiang ïa ki Uniform da kaba thoh kyrteng, “VDPCNA” ban pynïapher ïa ki dkhot ha ka por ba ki ïaid pahara bad ki khynra khnang ban pynsuk ïa ka rukom pynrung kyrteng bad ban pynthymmai ïa ki Village Defence Committee ban ïoh ïa ki khusnam, ki tiar ki tar
Ka VDPCNA ka la ïaiban ïa ka jingdonkam ban ïaid pahara ha ka por mynmiet, ban pyndait ïa ki CCTV Camera bad ban pynjari ïa ki kyndon kiba kham pyrkhing pyrshah ïa ka jingdie kyiad beaiñ bad ban khanglad ïa ka jingdih drok, ka jingdih kyiad ha ki jaka paidbah bad ki kam runar kiba shyrkhei.
