Shillong, Nailur, 05: Ki nongïalam jong ka Hynñiewtrep Integrated Territorial Organisation (HITO) Shillong City bad ka Mawlai Circle ryngkat ka jingsynran lang jong u Ophisar ka tnat Enforcement ka Khasi Hills Autonomous District Council ha ka sngi Thohdieng ki la leit ban khang khyrdep ïa ka dukan jong uwei u bar jylla kaba don ha Motphran.
Ha u kyrwoh ba ka seng ka la phah sha ki lad pathai khubor ryngkat bad ki video, u une u bar jylla u la phla ba u la shong dukan ha Motphran la san snem kynthih khlem aplai ïa ka Trading License bad ïa ka Labour License.
Ka seng ka la pyntip ba ka jingleit khynra ka long halor ka jinglap ba manla ka por ba une u bar jylla u ju wan ïalam lang ïa ki bahaing hasem jong u ban leh ïa ka kam khaii ha Sor Shillong khlem ka trading License.
Na ka liang jong u Ophisar ka tnat Enforcement ka Khasi Hills Autonomous District Council u la phah khang noh mardor ïa kane ka dukan bad bthah ïa u bar jylla tad haduh ba un da ïoh ïa ka Trading License na ka District Council.
Ka Seng ka la kyntu ïa ka tnat Enforcement ba ka dei ban khynra naphang bad ban khang mardor ïa ki dukan jong ki bar jylla ki bym don ïa ka Trading License bad kim dei ban ap haduh ban da leit khynra hi da ki kynhun seng.
