Shillong, Nailur, 05: Ka District Magistrate jong ka East Khasi Hills District ka Kong Rosetta Mary Kurbah ha ka hukum ba la pynmih ha ka sngi Palei, ka la pynjari da ka Section 163 BNSS ban khang pyrshah ïa ka jingïatur masi ha ki Fete ne kino kino ki tamasa kiba hap hapoh u pud u sam jong ka East Khasi Hills District.
Ha ka jingpynjari ïa ka hukum, ka District Magistrate ka la ong ba lada ailad ïa ka jingpynïatur masi kan long kum ka jingpynkhein ïa ka Section 11 jong ka Prevention of Cruelty to Animals Act, 1960 bad kan long ruh kum ka jingpynkhein ïa ka rai jong ka Iingbishar Supreme Court ba la pynmih ha u snem 2014.
Da kaba pyntreikam ïa ka iktiar ba la pynkupbor hapoh ka Section 163 BNSS, ka District Magistrate ka la maham ba lada lap ïa kino kino kiba pynkhein ïa kane ka jingmana kin shah pynshitom katkum ki kyndon jong ka aiñ.
Kane ka hukum kan treikam noh mardor tad haduh ban da pynbna da kumwei pat.
