M.M.Thaïang
Shisien phai la ki khmat bad kyrtoh lyndet ïa ki jingïohi kiba tang katto katne ha shiliang ka Ahtartum, kiba don na lyndet lum ban sngap ïa kane ki la ïohsngew bad haba ki la ïohsngew ki la wan jngoh bad haba ki la wan jngoh bad hadien ba la niat ïa ki Eitmat kiba la syngkhin tiaw ha ki khmat jong ki bad hadien ba la niat ïa ki Eitmat, ki Mawkyndon ki la hap na ki prang jingpuson jong ki bad kaba ailad pat sa shisien ïa ki Kjat Sngi ban kynjat jingshai shapoh bad ki la ïohi ba ïa ki Hali (Pynthor) baseisoh la sumar da ki Nongsumar bathiah thai ba khlem ai um ïa ki Hali ba ki jyngthung kin im bad san irat.
Ka Wahbah basngur kaba mih na ki lum ba kyntang ki Blei bad ka bym ju rngat kaba ju ai um ïa ki Hali (Pynthor) kam lah ban phaidien la ki khmat khlem da tuid sha ki Hali ( Pynthor) ban ai um ïa ki Jyngthung lyngba ki NUR wat lada hateng hateng la kjit ïa ka Um da ki ‘Liewtham. Ki Nongrep jong ki Hali (pynthor) kim ju thiah jaipdeh ne thiah sngi, hynrei miet step ki ïaid ki ieng bad pynkhuid ïa ki Khap ( NUR UM) shaduh Ban bad na Ban sha Hali ba ka um kan tuid kynjai sha ki Hali (pynthor) wat lada ym dap um kl Hali ( pynthor) hynrei pat kat ban sngem te ka sngem ka khyndew bad ki jyngthung kim ïapstai bad ki im.
U Mynder haba u la ïohi ïa ka Um kaba tuid kynjai sha ki Hali (pynthor) lyngba ki NUR, da ka mynsiem attup, u la kiew shaduh tyllong jong ka Wahbah da ka jingthmu ban pynrngat ïa ka um da kaba tih shisien tih syndon, hynrei pat ki Nongtihum ki ong ba ïa ka Um katba nangtih ka nangkylla wahbah bad lada pher tiak kan rah kyntieng ïa ki Nongkhura um bad kan lympat ïa ki Nongkhura um na uwei u mawlong sha uwei u mawlong.
U Mynder te u Mynder. U Mynder um suitkhai wat lada u la ïohi ba la ïong ngain ka bneng ban pynhap ïa u ‘lapmynsaw. Kat kum ka sainpyrkhat jong ki longshwa manshwa, ki ong ba hadien u ‘lappraw wan ki Kjat sngi baphyrnai bad ki Jyngthung ha ki Hali (Pynthor) kiba la sdang ïapstai, ki thie ki im biang, ki spehlung, ki jyrngam bad ki san irat bad ïa kane ka jingshisha ym lah ban shutep Eitmiaw ïathuh kiba don na thmitlum ban jngoh ïa kane.
U Kba ha kine ki Hali ( Pynthor) u la mih bad stem kmur kmur la donkam ïa ki Nongsumar bad ki Nongrep ban khreh ot ïa u Kba bad lum ha U Thiar hashwa ba ki Symboh kba kin hap tlor bad ngam shapoh ktieh.
