Shillong, Nailur, 11: Ka Meghalaya Basin Development Authority (MBDA) ka la ïoh pdiang haduh T. 224 klur ka jingïarap pisa ha ki lai snem ba la leit noh, ha kaba T. 182.30 klur la tang mang ha u snem 2024-25 na ka bynta ban pyntreikam ïa ki Sross-sectoral and Innovative Project ha ka state.
“T. 24 klur la pynïaid ha u snem 2023-24 bad T. 17.70 klur ha u snem 2022-23,” la pyntip u Myntri Rangbah ka Jylla u Conrad K. Sangma ha ka Dorbar Synrai jong ka Iingdorbar Thawaiñ ka jylla haba jubab ïa ka jingkylli ba la wanrah da u MLA ka VPP na North Shillong u Bah Adelbert Nongrum ha ka sngi Palei.
U Sangma u la pyntip ba ka Authority ka hap ruh hapoh ka jingpan jingkheiñ da u Comptroller & Auditor General of India, khnang ban pynthikna ïa ka jingtreikam kaba khuid bad kaba shai.
Ïa ka MBDA la pynkha ha u snem 2012 hapoh ka Society Registration Act 1860 kum ka Special Purpose Vehicle (SPV) bad ka Society.
U la pynshai ba ka Meghalaya Basin Management Agency (MBMA) ka dei ka shlem treikam bym ïoh kamai kaba la thaw katkum ka Section 8 jong ka Companies Act, bad la wanrah ïa ka namar ka jingdonkam jong ki tnad kiba na shabar kum ka IFAD.
U Myntri Rangbah u la batai ba ka MBDA ka dei kaba la pynkha khnang ban pyntyllun ïa ki projek pynroi bapher bapher bad ki projek thymmai bad kam don kano kano ka jingkhanglad ïa ka jinglah jong ka tnad ban pyntreikam ïa ki projek, la ki dei ki projek ba la ïarap nabar lane ki skhim ba la kyrshan da ka Sorkar Pdeng.
U Sangma u la ong ba ka rukom thungkam jong ka MBDA ka dei kaba la buh ryntih bad kaba shai, kaba kynthup ïa ka jingdon ka kyrdan pule bad ki eksamin kiba donkam.
U la pyntip ba ki don 729 ngut ki nongtrei kiba trei hapoh ka MBDA ki dei hi ki trai jylla, bad ïa ka jingpynrungkam la leh katkum ka Professional HR Policy.
Haba u Bah Nongrum u la pan jingtip halor ka jingdonkam ïa ka bor ba kyrpang ban pyntreikam ïa ki projek kiba wan nabar kaba pynpaw ïa ka jingbym lah jong ki tnat treikam ka Sorkar Jylla bad ki Ophisar, u Myntri Rangbah u la jubab ba ym lah satia bad ba ki tnad sorkar ki lah ban long kiba treikam bha, da kaba pynkiew ïa ka mang tyngka manla u snem.
“Ki projek kiba dei kyrpang na ka bynta ki tnad ki dang ïai bteng. Ka mang tyngka jong ngi ka la kiew na ka 9000 klur sha ka 30,000 klur kumta ha manla ka tnad ka mang tyngka ruh ka la kiew. Kumta, ka jingkylli jong ki tnad ba kim ïashim bynta ka long kaba bakla. Ka dei tang ka jingkylli jong ka jingïatreilang,” u la ong.
U la bynrap, “ïa kane ka leh namarba bun na ki tnat treikam ki don bynta bad ki ïatreilang lada donkam (na ka bynta ka jingpyntreikam ïa ki projek).
U la ïathuh ba ka jingpyndonkam ïa ka MBDA na ka bynta ban pyntreikam ïa ki projek ka long namarba ka donkam ïa ka jingïatreilang na kiba bun ki tnat treikam, ym ban shu shaniah tang ha ka jinglah jong ki tnat treikam ka Sorkar.
Halor ka jingkylli jong u MLA ka VPP na Mawryngkneng u Bah Heavingstone Kharpran, u Myntri Rangbah u la ong ba ki projek kiba ïadei bad ka jingïada ïa ki tylllong um ha Shillong bad ha Tura ki dang ïaid shakhmat.
