Shillong, Nailur, 15: Ki kmie ki kpa ki don hapdeng ka jinglynga mynsiem bad ki don hapdeng ka jingbymsngew shngaiñ ban phah hi ïa la ki khun sha skul bad wat ba kin ïalehkai tang ha phyllaw iing ruh i kumba kam don shuh ka jingshngaiñ.
Ki jingjia kiba har rukom pyrshah ïa ki khynnah rit ka la long ka mat ïakren kat shaba ïaid ba ieng kaba pynsyier mynsiem ïa ki kmie ki kpa.
Lyngba kane ka khubor, ngi kwah ban pynkynmaw hangne ba tang hapoh ar bnai, kata, tang hapoh East Khasi Hills District ki la don haduh hynriew tylli ki jingjia kiba sngewtriem kiba la jia ïa ki khynnah rit bad kane ka long tang kaba tip paidbah ne kaba ki kmie ki kpa bad ki bor shnong ki pyntip sha ki Pulit hynrei katkum ka jingtip ba ngi la ïoh lum ki dang don kiba kum kine ki jingjia ïa kaba ym shym la pyntip sha ki Pulit.
Ha u bnai Jylliew, 2025, ki la don ki kynhun ki runar kiba loit jubor ïa ki sohshkor jong ki khynnah skul kiba ïaid lynti ha Mawlai, kane ka la jia ha u bnai Jylliew. Ka jingjia ruh ka dei kaba la jia arsien, kawei ha Mawlai Nongkwar bad kawei pat ha Mawlai Nonglum. Ha kane ka jingjia ki Pulit ki la ïohkem ïa kiba donkti bad ki la ïoh kurup ruh ïa ka sohshkor na kawei ka dukan shna ksiar kaba don ha Mawbah, Shillong.
Nangta shi bnai mynshuwa, la don i khynnah skul jong ka Sacred Heart Boys ha Mawlai iba la shu lait im da ka said na ka kti ki runar kiba leh mynleh ïalade kum ki bahaiing hasem kiba leit shaw skul ki la pynbiej ïa i khynnah da ki jingbam bad ki kam ba la phah ïa ki da i kmie jong i khynnah ban wan shaw hynrei na ka daw ka jingbym ithuh namarba ki la kahdur ïalade ita i khynnah i la phet bak bad lait thaw na ka tyrsim jong ki runar.
Dang ar taiew mynshuwa, ka khynnah skul jong ka Auxillium Higher Secondary Schoool, Nongthymmai, Shillong ka la shah pynap tari na ryndang ha ki runar kiba la kahdur bad kiba la lute bad rong lut kat kiba ka don ha pla jong ka.
Kajuh ka jingjia ka la jia dang ar taiew mynshuwa, ha kaba ki runar kiba la kahdur kiba wan da ka kali Maruti Van ki la pynbiej da u mitmit ïa uwei u khynnah skul ha Mawryngkneng hynrei uta u khynnah ruh u la lait im namarba u la phet noh naba um ithuh ïa kita ki briew.
Ka jingjia kaba la jia dang saw sngi mynshwa ha Mawshbuit ka dei ka jingjia kaba pynsngewtriem shisha ïa ki kmie ki kpa namarba u khun jong ki u dang ïalehkai ha phyllaw hynrei la don ki briew ki bym ithuh kiba la khot ïa u bad ki pynbiej da ki kot lehkai Pokemon bad ki la pyndih da ki kynja dawai pynbu-aid hynrei shuwa ba un ïapler une u khynnah u la phet noh bak sha la iing ban ïathuh ïa ka kmie. U khynnah u la shitom jur bad la pynkit ïa u sha ICU ha Ganesh Das Hospital, Shillong bad mynta u la ïoh biang ïa ka jingkoit jingkhiah.
Kaba pynpar niangkhriat shuh shuh bad kaba la pynbitar ruh ïa ki paidbah ka dei ka jingjia ha ka 15 tarik, Nailur 2025 ha kaba la lap ïa ka metïap jong i heprit Insaphira Lyngdoh Mawnai najan ka iing sah jong i kaba don ha ka shnong Nongrah, Nonglum, Dong Brei. I Heprit Insaphira, iba la 4 snem ka rta i la jahrngai na phyllaw iing lajong ha ka 14 tarik, Nailur 2025 hynrei tang ha ka sngi kaba bud la lap pynban ïa ka metïap jong i.
Kine ki jingjia ki la pynduhjer bad pynpar niangkhrïat ïa ki paidbah bad ka la pynbitar ruh ïa ki paidbah ba balei ki runar mynta kim mab shuh wat ïa ki khynnah rit ki bym tip ïa ka dang ka duh ruh.
Jan manla ki skul mynta ki la khangdam lut ïa baroh ki khyrdop tang mar ïa sdang skul bad kim nud shuh ban plie rynghang bad bun ruh ki skul kiba la pyrkhing shisha wat shuwa ban pyllait ïa ki khynnah ruh hadien ba la wai skul lada khlem pat tikna ki dei mano kiba wan shaw ïa ki.
Ka jingkylli kaba mih mynta ka long na ka daw aiu ba jyllei ki kam runar ruser pyrshah ïa ki khynnah haduh katne katne, hato u drok u dei ka daw jong kine ki jingjia baroh, kiei ki lad ki lynti kiba ka sorkar lane ka bor shnong kin shim ban ïada na kum kine ki jingjia ki bym dei shuh ki jingjia kiba tyngkhat hynrei kiba la ïai jia shi iai jia na ka por sha ka por bad da kano ka lynti ka sorkar kan shim ban wanrah biang ka jingsngew shngaiñ ha ki kmie ki kpa, ki nonghikai ne ki bor pyniaid skul?
