Shillong, Nailur 18: Ka Federation of Khasi Jaiñtia and Garo People (FKJGP) Upper Shillong Circle ha ka sngi Palei hapoh ka jingïalam jong u Samla Kitboklang Nongphlang, President FKJGP Upper Shillong Circle ha kaba la synran lang da u Samla Hopewell Kharkongngor, President FKJGP Mawñianglah Unit, Samla Donkupar Nongdhar President FKJGP Pomlum Unit, Samla Bantei Nongkhlaw President FKJGP Bañiun Unit lem bad kiwei pat ki dkhot jong ka FKJGP Upper Shillong Circle ki la leit ban ïakynduh ïa u General Manager jong ka NHIDCL ban dawa ba ki company bapher bapher kiba pyntrei ïa ka surok fourlane naduh umshyrpi ter ter ki dei ban pynsted noh ïa ka kam khnang ba kan ym ktah ïa ka leit ka wan jong ki paidbah kiba ïaid lynti na katei ka surok bah.
Na ka liang jong u General Manager ka NHIDCL u la ai ka jingpyntikna ba la kumno kumno kin pyrshang ban pyndep noh ïa ka jingtrei ha ki bynta jong ka thaiñ Upper Shillong ha u bnai Nohprah 2025 lane ha u bnai Kyllalyngkot 2026.
Ha katei ka sngi na ka liang jong ka FKJGP Upper Shillong Circle ka la dawa ruh ba ki company/contractor ki dei ban maramot kloi ïa ki katto katne tylli ki bynta kiba la ktah shi katdei eh ïa la leit ka wan jong ki paidbah lyngba ka jingdheng kali kaba shyrkhei khamtam ha ki sngi Nyngkong, sngi thohdieng bad sngi saitjaiñ kaba pynsyrtok ïa ki nongleit nongwan khamtam hi ki bynta jong ka Umshyrpi haduh Ladlummawbah, ki bynta jong ka Shnong Sawmer hajan Sunny site, ki bynta ha lad jong ka Shnong Mawklot bad lad Lum Shyllong, ki bynta jong ka 7mer hajan Elephant Falls, ki bynta jong ka Shnong Pomlum hajan jong ka PHC bad kumjuh ruh ki bynta jong ka shnong Bañiun ban leit sha Mylliem.
Ka seng ka la shimkhia ban kren ïa katei ka bynta namar lyngba ka jingdheng kali kaba shyrkhei khlem pep kan sa ktah ïa kiba bun ki samla pule ki ban sa ïaleh ïa ki Examination bapher bapher ha kine ki khyndiat bnai ki ban sa wan. Na ka liang jong u General Manager ka NHIDCL u la ai ka jingkular hakhmat ki nongïalam jong ka seng ba un sa bthah mardor ïa ki Company/Contractor ba kin leh ïa kaba donkam bad ba kin sa pynlong ruh ïa ka jingleit jurip ha ryngkat ki nongïalam jong ka seng khnang ba kan pynsuk ïa ka leit ka wan jong ki paidbah.
Ka Seng ka la dawa ruh na u General Manager jong ka NHIDCL ba u dei ban bthah ïa ki Company/Contractor ban pynthikna ba ki nongtrei bylla bar jylla ki dei ban pynbiang ïa ki kot ki sla kiba biang bad ba dei ban pyrkhing namarba ym lah ban tip ba ïoh lehse ki mynder kiba la shah kyndang na ka jylla Assam kin ïoh ban riehtngen bad ban sah duh ha ka thaiñ Upper Shillong ha ka dur jong ki nongbylla sngi.
Ha kaba ïadei bad ki nongtrei bar jylla na ka liang jong u General Manager ka NHIDCL u la kular ban ai ka jingïatreilang bad ka seng khnang ba kan ym don satia kano kano ka jingdkoh jong ka kam ban pyntrei ïa katei ka surok bah. Ha kajuh ka por na ka liang jong ka seng ka la kyntu ruh ïa baroh ki Dorbar Shnong ba kin long kiba peitngor bha bad kumjuh ruh ban ai ka jingïatreilang bad ka seng ha kaba ïadei bad ka jingwan buhai shnong jong ki briew kiba nabar bad kumjuh ruh ban tehlakam ïa ki kam sniew kiba la sdang ban kynrei ha ka thaiñ naduh ki kam tuh kam thiem bad kumjuh ruh ban pyrkhing ïa ka jingjyllei jong u Drug ym tang ha ka thaiñ hynrei ha ka Bri u Hynñiewtrep bad ha ka jylla hi baroh kawei, ong ka kyrwoh na u Kenny Kurkalang, Information Secretary ka FKJGP Upper Shillong Circle.
