Shillong, Nailur, 18: U Secretary General ka United Democratic Party (UDP) uba long ruh u MDC na Sohra Bah Titosstarwell Chyne ha ka sngi Palei u la ong ba ka Sohra, kaba long kawei na ki jaka jngohkai pyrthei kaba pawnam, ka la shah ktah na ka jingïakhih ba khlem pud sngi ba la khot da ka All Khasi Meghalaya Tourist Taxis Association (AKMTTA) an khang ïa ki kali kamai Tourist na ka jylla Assam ban rung sha ki jaka jngohkai pyrthei kiba don ha ka jylla Meghalaya,
Katkum ka jingong jong u, ka ïoh ka kot ha ka thaiñ, kaba ju shaniah nadong shadong ha ka kam jngohkai pyrthei, ka la mad ïa ka jingduhnong kaba shyrkhei na ka daw ka jingbym don shuh ki jngohkai pyrthei. Ki nongseng kam lajong, kynthup ruh ki nongbuh iing basa, ki nongdie sha, ki dukan bam ruh ki la mad ïa ka jingduhnong.
Kane ka jingïakhih kaba la sdang dang shen ka la pynlong ruh ïa ki nongjngohkai pyrthei ban pynsangehnoh ïa ka jingshim wai ïa ki kamra sah iing basah bad ka la ktah bha ïa ka kamai kajih jong ki briew kiba shaniah ha ki kam jngohkai pyrthei ha ka thaiñ Sohra.
Ha ka jingïakren bad ki lad pathai khubor, u Bah Chyne u la ong ba watla ki jingdawa jong ka AKMTTA ki long kiba shongnia hynrei ka rukom ba ki pynpaw ïa kane ka mat kan nang ktah shuh shuh ïa ki jaka jngohkai pyrthei ha ka jylla khamtam ïa ka Sohra.
“(Ki paidbah) Sohra hadien ba la khang noh ïa ka karkhana Mawmluh Cherra Cement Ltd (MCCL), kim don lad shuh hynrei ki shaniah pura (ïa ka jingim jong ki) ha ki kam jngohkai pyrthei. Shibun ki riewshimet, ki kynhun bad ki kompeni ki la sdang ban plie ïa la ki jong ki Hotel, ki jaka sah ha ki ïing da kaba shim ram na ki Bank bapher bapher bad ki tnad jngohkai pyrthei jong ka Sorkar. Na kata ka daw, lada ka don ka jingshah pynthud kumne manla ka por kumne kan ym ktah tang ïa mynta hynrei kan ktah ïa ka lawei ruh namarba ki nongjngohkai pyrthei kin sa sngewsih bad sngew ba kam long kaba shngaiñ ban wan sha kine ki jaka jngohkai pyrthei namar kin sngew ba kin don shibun ki jingeh ha lynti. Dei na kata ka daw katkum ka jingtip ba la lum, baroh ki nongjngohkai pyrthei ki la phah pyndam noh ïa ka jingshim wai ïa ki kamra ha ki hotel,” ong u Bah Chyne bad bynrap, “lada kane kan dang ïaid bteng, kan ktah bha ïa ka ïoh ka kot ha ka thaiñ. Kan ktah ym tang ïa ki paidbah kiba don bynta ha ki kam jngohkai pyrthei, hynrei kan ktah ruh ïa ki nongdie sha, ïa ki briew kiba die jingdie ha ki jaka jngohkai pyrthei, ki dhaba, ki restaurant bad kiwei kiwei.”
U nongïalam ka UDP u la kyrpad ïa ka AKMTTA ban wan sha ka miej jingïakren da kaba pdiang sngewbha ïa ka jingkhot ïakren jong ka Sorkar Jylla ha ka 23 tarik mynta u bnai.
U la pynskhem ruh ïa ka jingdonkam ban don da ka polisi kaba shai ban pynbeit ïa ki jingeh, da kaba ai nuksa na kiwei pat ki jylla kum ka Sikkim bad Odisha, kiba la pyntreikam ïa ki polisi kiba treikam bha ban pynïaid ïa ki kali kamai Tourist..
U Bah Chyne u la ai jingmut ba ka tnad Transport ryngkat bad kiwei kiwei ki tnad ki dei ban don bynta lang ban wad ïa ki lad ki lynti ban weng ïa kane ka jingeh. U la ban jur ba ka polisi lane ka rukom treikam kaba shai ka long kaba donkam khnang ban lait na kum kine ki jingïakajia ha ki por ban sa wan bad ban pyntikna ïa ka jingïaid beit ïaid ryntih jong ka kam jngohkai pyrthei ha ka jylla.
U MDC ula kyntu ïa ka Sorkar Jylla ban shimkhia bha ïa kane ka mat bad ban pynthikna ba ka jingïalang bad ka AKMTTA ka dei ban kular ban ïa pynbeit ïa ka jingeh.
Katkum ka jingong jong u, ka jingïapynbeit kaba neh junom ka long kaba donkam bha ban ïada ïa ka jingmyntoi jong ki trai shnong bad ka karkhana jngohkai pyrthei.
“Lada ym don ka polisi kaba shai, kane ka jingeh kan sa mih hi. Lada phi ong ba ki kali Assam kim lah ban rung sha Meghalaya ka Assam ruh kan ong kumjuh. Dei na kata ka daw ba ka don ka jinglait rynghang kaba kaba heh bha hangne kumta ka Sorkar ka dei ban shim ïa ka rai,” u la bynrap.
