Shillong, Nailur, 21: Ka United Democratic Party (UDP) Amlarem Circle bad ka War Jaiñtia Circle ki la phah ïa ka jingai khublei bad ka jingsngewnguh ïa u Myntri Rangbah ka Jylla u Conrad K. Sangma uba la pynrung ïa u MLA ka Amlarem Constituency u Bah Lahkmen Rymbui ha ka Kynhun Myntri ka Sorkar Jylla.

Ha ka samoi treikam kaba ar jong ka Sorkar MDA-II u Bah Lahkmen Rymbui, hadien ba la shah pynbam smai kum u Myntri ka Sorkar Jylla, u la ïoh bat binag ïa ka tnat Pule Puthi, ka tnat Revenue and Disaster Management, ka tnat Information and Public Relations bad ka tnat Law 

“Ka UDP na Amlarem Circle bad Unit ki pynpaw ïa ka jingsngewnguh bad ka jingsngewburom ïa ka Sorkar MDA kaba la pynkup burom ïa u MLA jong ngi na ka thaiñ War Jaiñtia bad khamtam eh ngi pynpaw ïa ka jingsngewnguh ïa ki nongïalam jong ka UDP naduh na ka State shaduh ki District bad Circle kiba la ai bad mynjur ban pdiang ïa kane ka kam ban ai ha u MLA jong ngi kum u Myntri ha kane ka kynti khnang ba un lah ban trei bad ban wanrah ïa ki skhim bad ki song pynroi hapoh ka thaiñ jong ngi bad hapoh ka jylla baroh kawei,” ong u kyrwoh ba la phah da u Adviser ka UDP Amlarem Circle u Bah Kolmen Pohshna.

“Ngi kitbok kitrwiang bad ngi ai ruh ka jingkyrkhu kyrdoh ïa u MLA jong ngi ba un ïoh ïa ka met ka phad kaba koit ba khiah khnang ba un wanrah shibun ki kam pynroi ha kane ka thaiñ jong ngi bad ha ka Sub Division kaba dang donkam shibun ban kyntiew kyrdan ïa kane ka Sub Division namar ba ka Amlarem Sub-dvision kaba hapoh ka West Jaiñtia Hills District ka long kawei na ki Sub-division kaba la rim tam hapoh ka jylla Meghalaya bad kan ym slem shuh ban rakhe ïa ka jingdap 50 snem jong ka bad ka dei hok ban ïoh Myntri khnang ban wanrah ïa ka roi ka par na ka bynta ki paid nongshong shnong jong ka Amlarem Civil Sub-division,” la ong u kyrwoh.

Ka party ka la kyrpad ïa ki paidbah nongshong shnong jong ka thaiñ War Jaiñtia, ïa ki Waheh Shnong bad ïa ki kynhun bapher bapher ba kin ïatreilang bad u MLA na ka bynta ka jingmyntoi jong ka Constituency baroh kawei.