Bah D. Pakynteiñ
Ha u snem 2003, lah wanrah ïa ka aiñ, lyngbaka Constitution (Ninety-First Amendment) Act, 2003, bad la pyntip (notified) hadien ba lah ïoh ka jingmynjur na u President, ha ka taiew kaba nyngkong u bnai January, 2004, ba baroh ki jylla kiba bun myntri, ki hap ban pynduna hapoh 6 bnai, bad kane ka aiñ ka treikam pura naduh ka 7 tarik u July, 2004. Kane ka aiñ, ka bsut ïa ka dkhot (1A) ha ka artikel 75, ba ym lah ban don myntri palat ïa 15 na ka 100 (15%) kynthup bad u PM,kumjuh ruh ïa kajuh ka dkhot la bsut ha ka artikel 164 jong ka Konstitushon ka Ri, ba ha ki jylla ym lah ban don myntri palat ïa ka 15%kynthup bad u CM bad ruh ym dei ban duna ïa ka 12 ngut.Kumta ha ka jylla jongngi don12 ngut ki myntri ha ka jaka 9 ngut wat lada ka don tang 60 ngut ki MLA,ka Mizoram kaba don tang 40 ngut ki MLA, ka hap hi bandon 12 ngut kat kum ka aiñ (8 ngut ki myntri bad 4 ngut ki myntri khynnah).Lada ngi phai pat sha ka jylla Uttar Pradesh kaba don 403 ngut ki MLA, kaba lah ban don haduh 60 ngut, hynrei kat ïa mynta,ka don 53 ngut, kata 19 ngut ki cabinet + 14 ngut ki myntri khynnah ba ïoh bat laitluid ïa ki tnad treikam (MoS Independent-charge) + 20 ngut ki myntri khynnah (MoS);Katbaha ka National Capital Territory jong ka Delhi, tang 10% lah ban don myntri, 70 ngut ki MLA, 7 ngut ki myntri, kat kum ka artikel 239AA(4) jong ka Konstitushon ka Ri.
Kat ïa mynta hi, ha Ri India don kumba 4131 ngut ki MLA, lah ban bun hajar ki myntri, lada kam don katai ka aiñ, kaba la pynkunai ruh ïa ka pla tyngka jong baroh ki jylla, ka kham pynsting ruh ïa ka sorkar kmie, kabaha hap hi ban kyrshan, ïa ki jylla, kum ha ki por ba shlei um, bad kiwei ki jingjia bym poi pyrkhat (natural disaster) badruh ïa ki jylla kiba duna ka jingmih bad duna ka jingïoh lum khajna, wat lada ka dei ka kamram jong ka sorkar pdeng, ban bei pisa ïa ki kam pynroi ha baroh ki jylla bad ki union territory, khlem da lah shilliang bad khlem da peit seng, namar baroh ngi siew khajna.
Hato lah donkam mo ban don kum katai ka aiñ ha ki District Councils? Hap ai ka jingïaroh ïa ka Voice of People Party (VPP) kaba pyni nuksa da kabapynduna hi dalade ïa ki dkhot ka Executive Committee ha KHADC, ba kam sngewdei ban pynlut phut.Sngew ïahap ba ym dei ba donkam tang katai ka aiñ ba lah kdew haneng, donkam ruh sa ka aiñ kyntiap seng ha ki District Councils namar ïa ki MDC ruh lah jied hi da ki paidbah, kumba jied ïa ki MP bad MLA.
Ban pynkut, ha u snem 1967, don uwei u Independent MLAna kawei ka jylla thymmai, hadien ba ma u, lem bad ki paralok MLA,ki lah pynïasoh ïalade bad ka Congress, u phet seng haduh lai sien ha ki ar taiew, don ka sien kaba u neh tang khyndai kynta,shiphang badka Congress shiphang bad ka United Front,haduh ba mih ïa kaneka kyntien ba kit jingmut (phrase) bad kaba pawnam bha ha Ri India haduh kine ki sngi; “Aaya Ram Gaya Ram”.
