Shillong, Risaw, 08: Ka BJP Meghalaya State Unit ka la kyrpad ïa ka Sorkar Jylla ban ailad ïa ki samla pule Graduate kiba dang ap ïa ka result jong ka Final Year ba kin ïakhun ïa ka Preliminary Stage jong ka eksamin Meghalaya Civil Services (MCS) bad Meghalaya Police Service (MPS).
U nongaiktien jong ka BJP u Bah M. Kharkrang ha ka jingïakren bad ki lad pathai khubor u la ong ba ka seng ka la phah ruh da ka dorkhas sha ka Sorkar ba kan pyrkhat lem na ka bynta ka jingmyntoi jong ki samla pule namarba ka MPSC ka ju pynlong ïa ka eksamin MCS bad MPS shisien san snem hynrei ym kum ka Union Public Service Commission, New Delhi, kaba ju pynlong manla u snem.
“Ka jingkyrpad jong ka party ïa ka Sorkar ka long ban ailad ïa ki samla pule Graduate kiba dang ap ïa ka result jong ka Final Year ba kin ïoh aplai bad ïakhun ïa ka preliminary stage jong ka eksamin MCS bad MPS da kaba buh ruh ïa ki kyndon ba ki nongïakhun eksamin ki dei ban pyni ïa ki sakhi sabut ba la pyndep ïa ka Degree shwa ban thep ïa ki aplikeshon bad ïa ki kot ki sla na ka bynta ka Main Examination,” u la bynrap.
“Kane kan plie ïa ka jingkhang jong ki samla the kam nalor kaba plie lad ruh ïa ki samla pule kiba dang ap ïa ka result jong ka Final Year kumba la leh da ka Union Public Service Commission,” u la ong
Ïa mynta, ka MPSC ka bthah ïa ki nong aplai ba ki dei ban pyndep shwa ïa ka Graduation khnang ba kin dup lah ban aplai ban ïakhun ïa ka eksamin MCS/MPS. U la ong ba ka kyndon ba la buh da ka MPSC ka la khanglad ïa ki samla kiba angnud ban ïakhun ïa ka eksamin MCS, MPS, ym kum ka UPSC, kaba ailad ïa ki nongaplai naduh ka preliminary stage bad ban aiti pat ïa ki syrnot ba la pas Degree shwa ban ïakhun sa ïa ka Main Examination.
