Shillong, Risaw, 08: Ka Jaiñtia National Council (JNC) ka la phah tuklar ha u MP ka Shillong u Dr. Ricky AJ Syngkon halor ka jingslem ban shna ïa ka surokbah National Highway (NH-6) ha ka thaiñ rilum Jaiñtia.
Ha ka shithi ba la aiti da ha u Dr. Syngkon ha ka sngi Baar ka JNC ka la ong watla ka jingbei pisa ka long da ki spah klur, hynrei ka projek haduh mynta ka dang sahtegn, ka jingtrei torti bad ka rukom shna ka bym skhem.
Kane ka projek ha kaba ka National Highways Authority of India (NHAI) kam shym la pyndep ïa ka por ba la buh da ka ïingbishar ha u bnai Nailar 2025, la ong ka JNC bad bynrap ba kane ka la wanrah ïa ka jingdheng kali kaba manla ka sngi, ka jingkiew ka jinglut ha ka umphniang, bad ka jingsahkut jong ki nongleit nongwan da ki kynta.
Ka JNC ka la ther tyngeh ruh ïa ki kontraktor ba dei peit ïa kane ka kam, ka Purbanchal Buildtech Pvt. Ltd. bad ka Dhar Construction Company Ltd namarba ka jingslem ban pyntyllun shakhmat ïa ka kam bad ka jingtrei kaba torti. Ka Seng ka la dawa ruh ba dei ban bishar bniah ïa ka jingtreikam jong ka Purbanchal Buildtech bad ban bishar bniah na ka bynta ban ai dak saw.
Ka la kynnoh ba ka surokbah kaba dang shna thymmai ka kham rit ban ïa kaba rim, kaba la wanrah ïa ka jingkhapngiah jong ïa ki kali ha ka leit ka wan. Kane ka rukom shna pynrit ïa ka sruok ka buh jingma ïa ka jingshngaiñ bad ka khanglad ïa ka jingpynheh ha ki sngi ki ban sa wan.
Ka jingpyndonkam ban shna da ka dewbilat ïa ki lynti ïaid ha ki jaka ba jur slap ka la wanrah ïa ki jingtwa kiba lah ban ïohi tyngkreiñ, ki jaka bym ïahap bad ka jingshah pynjulor ha ka um.
Ka jingbym biang ki nala pyntuid um la khmihlynti ruh ba kan wanrah ïa ka jingshlei um, ka jingtwa khyndew bad ka jingkhoh noh noh jong ka rong tang hapoh khyndiat por.
Ki bynta jong ka surokbah ba la shna thymmai ki la sdang ban sniew bad ban orpait, kaba pyni ba la pyndonkam da ki tiar kiba sniew bad ka jingbym biang ka rukom trei.
Ha kaba ïadei bad kane, ka JNC ka la kyrpad ïa u MP ban rah ïa kane ka kam hakhmat ka Ministry of Road Transport and Highways (MoRTH) na ka bynta ban pan jubab na ka NHAI bad na ki kontraktor kiba donkti.
Ka la kyrpad ruh ban pynlong ïa ka jingjurip ba kyrpang bad ka jingpeit bniah ïa ki jinglong jingman ha kaba shna ïa ka surok bad ka jingbud ryntih ïa ki kyndon jingshngaiñ.
Ka seng ka la kyntu ruh ba dei ban pynshitom bad ban set ïa ka pisa ba dei ban siew sha ki kontraktor lada lap ba ki donkti ha ka jingbym shimkhia ne bamsap nalor ban pynthikna ba dei ban pyndep ha ka por kaba biang ïa ka projek.
U MP u la kular ba un sa kren ïa kane ka mat bad da lade hi ruh un sa leit jurip ïa ka surok bad ban shim ïa ki lad ki lynti na ka bynta ka bha ka miat bad ka roi ka par jong ki paidbah ka rilum Jaiñtia.
