Shillong, Risaw, 13: U Myntri Rangbah ka Jylla u Conrad Conrad K Sangma u la pyntip ba ka jingshimti jong ka Sorkar ïa ki skul SSA bad ka jingpyntreikam pura ïa ka rukom siew tulop sha ki 14,000 hajar ngut tam ki nonghikai SSA ha ka jylla ka la jan poi artat sha ka khep kaba khatduh.
Ïa kane la pyntip da u President jong ka Meghalaya SSA Schools Association u Bah Aristotle C. Rymbai hadien ka jingïakynduh ïa u Myntri Rangbah ha ka 13 tarik Risaw, 2025.
U Bah Rymbai u la ïathuh ruh ba ka Sorkar ka la pynbeit ban pynlong ïa ka jingïakynduh lang ha ka 16tarik Risaw, 2025 ban ïakren sani halor kine ki ar tylli ki mat bad ki nongïalam jong ki nonghikai skul SSA.
“Ka jingïalang ka long kaba seisoh. U Myntri Rangbah u la pyntip ïa ka Association ba ki kot ki sla ba la pynkhreh na ka bynta ki mat jingdawa ba dang sah teng jong ki nonghikai SSA ha kaba ïadei bad ka jingshimti ïa ki skul SSA..bad ha kaba ïadei bad ka jingpyntreikam ïa ka jingsiew tulop ïa ki nonghikai SSA ka la poi ha ka kyrdan kaba khatduh,” la ïathuh u Bah Rymbai ha ki lad pathai khubor.
U la pyntip ba ka jingïalang buddien halor la buh ban pynlong ha ka sngi Palei, ha kaba u Myntri Rangbah ka jylla, u Conrad K. Sangma, u Myntri ka tnad Pule Puthi u Lahkmen Rymbui bad ki ophisar na ka tnad pule puthi kin sa ïakren shuh shuh ïa kine ki mat.
“Ha ka sngi Palei (16 tarik Risaw), kan ssa don ka jingïalang ban pynïaid da u Myntri Rangbah ka jylla bad baroh yn sa wanrah ha ka jingïalang,” la ong u Bah Rymbai haba bynrap ba ka seng kan ap ïa ka rai kaba mih na ka jingïalang.
Kum ban shu pntip, palat 3,332 tylli ki skul SSA ha Meghalaya ki la aiti ïa ki No Objection Certificate (NOC) ban aiti ïa ka jingpynïaid jong ki sha ka Sorkar Jylla, na ki 5,131 tylli ki skul SSA kiba don ha ka jylla baroh kawei.
Na kine, ki don 298 tylli ki skul SSA ba la pynïaid da ki kynhun niam bad ki kynhun shimet.
