Shillong, Naiwieng, 10: Ka Ka Joint Action Committee (JAC) kaba kynthup ïa ka East Jaiñtia Hills Truck Owner & Driver Association (EJHTOTA) bad ka Jaiñtia Hills Truck Owners Association (JHTOA), ha ka Lah Sngi u Blei ka la dawa ïa u Symbud Myntri Rangbah ka jylla uba khmih ïa ka tnat Transport Bah Sniawbhalang Dhar ban khot ïakren ïa baroh ki seng trok khnang ban pynkut noh ïa ka jingïakhih jong ka Meghalaya Commercial Truck Owners and Drivers Association (MCTODA).
Ha u kyrwoh ba la phah sha ki lad pathai khubor u Chairman Bah Biangshwa Shylla u la ong ha ka jingïakynduh ïa u Bah Sniawbhalang Dhar, ka JAC ka la pynsngew lut ha u ïa ki jingeh ba ki nongniah trok ki la mad mynta la ar taiew pura na ka daw jong ka jingbym ïoh shuh jong ki trok ban leit kamai kajih.
“Ngi la pynkynmaw biang ïa u Symbud Myntri Rangbah halor ka jingkular jong ka Sorkar ïa ka JAC ban lum kloi noh ïa ka jingïalang jong baroh ki kynhun hadien ba ladep ka shuti Puja bad ka Assembly Session, khnang ba yn ïoh ïashong pyrkhat bad ïashim rai na ka bynta ki mat jingdawa jong ka JAC ban pynkiew ïa ka bai kit dewbilat bad bad clinker na ki karkhana pynmih dewblat ha East Jaiñtia Hills,” u la ong.
“Ngi la pynsngew ruh ha u, ïa ka jingud ka jinglyniar jong ki trai trok, ki nongshalan mar bad ki nongniah trok bad ka longing longsem jong ki, halor ki jingsohsat kiba mih na ki jingdawa ba donkam eh bad ba bun jait ha iing ha sem – kum ka bam ka dih, sa ka pang ka shitom, ka bai dawai dashin bad kiwei kiwei de”, la ong u Chairman ka JAC.
U Asst. Secretary ka JAC Bah Deolangki Dkhar u la bynrap, ‘ngi la pynsngew ruh ha u Symbud Myntri Rangbah ïa ka jingeh ba ki trai trok bad ki nongshalan mar ki hap ban siew ïa ka EMI jong ki trok sha ki Bank; ka bai skul, ka bai hostel, kaba la pyndik ïa ka pule puthi bad wat ïa ka lawei jong ki khun ki kti jong ngi. Ka jingwan ka Khristmas bad u Snem Thymmai bad kiwei kiwei de ki jingeh, nalor ka jingshah ktah na ka jinglum khajna jong ka Sorkar Jylla tang na ka daw jong kane ka jingïakhih kaba lah neh mynta da ki taïew.”
