Shillong, Naiwieng, 10: Ka Khasi Students Union (KSU) Bengaluru Unit ka la dawa ïa ka Sorkar Meghalaya ban shna pyndep bad ban pyntreikam noh ïa ka Meghalaya House ha Bengaluru, Karnataka khnang ba kan long ka jingmyntoi ïa ki paidbah ka jylla Meghalaya bad khamtam eh ïa ki samla Khasi, Jaiñtia bad Garo kiba leit pule ha nongbah Bengaluru.
Ban pynurlong ïa kane ka jingdawa ka seng ka la aiti da ka dorkhas ha u James PK Sangma, u hymmen jong u Myntri Rangbah ka Jylla Meghalaya u Conrad K. Sangma, uba la long kum u kongsan ha ka North East Fusion Carnival kaba la long ha Bengaluru.
Ha ka Carnival la ïashim bynta shitrhem da ki jaidbynriew trai muluk ka thaiñ Shatei Lammihngi.
“Kane ka jingdawa ka la sahteng ha kaba ka KSU Bengaluru Unit ka la buh hakhmat ka Sorkar Meghalaya la bun hun snem. Ka KSU ka dawa ïa kane ka mat namarba bun ngut ki Khasi ki pule bad trei ha Bengaluru bad ki don ruh ki khep ba kim ïoh jaka sah kiba suk kum ha Kolkata ne Delhi,” la ong u kyrwoh ba la phah da ka KSU.
Ka Seng ka la kyntu ruh ïa ka Sorkar Meghalaya ban ïarap lem ïa ki Khasi kiba ïap ha Bengaluru ban pynpoi ïa ka met ba dang sah sha ri Khasi. “Bun na ki Khasi kiba trei bad pule sha Karnataka ki wan na ki longiing baduk bad lada jia kano kano ka jingjia kaba sngewsih ka shitom bha ban kyrshan ïa ki wat lada ka KSU ka ïaleh katba lah ban ïarap ïa ki,” la pynpaw ka seng.
Ka KSU ka la dawa ruh ïa ka Sorkar Meghalaya ban pynïasoh khlem sangeh ïa ka leit ka wan lyngba ka liengsuin na Meghalaya sha Bengaluru, khnang ban pynsuk ïa ki paidbah.
