Shillong, Naiwieng 16: Ka College of Post Graduate Studies in Agricultural Sciences (CPGSAS), Central Agricultural University (Imphal), Umïam, Meghalaya, ka la rakhe ïa ka Janjatiya Gaurav Diwas ha ka 15 tarik u Naiwieng, 2025, da ka jingshitrhem kaba khraw, kaba rakhe ïa ka pateng deiriti ba riewspah, ki jingnoh synñiang, bad ka jingskhem jingmut ki jaitbynriew riewlum jong ka India.
Ïa kane ka prokram la pynlong hapoh ka jingïalam jong u Dr. Anupam Mishra, Vice Chancellor, CAU, Imphal, bad u Prof. Dwipendra Thakuria, Dean, CPGSAS. Baroh arngut ki nongïalam ki la pynpaw ïa ka jingkongsan jong kane ka sngi ha kaba pyndonburom ïa ka pateng jong ki jaitbynriew riewlum bad pynskhem biang ïa ka jingkular jong ka jaka pule ban kynthup lang bad na ka bynta ka bha ka miat jong ka imlang sahlang.
Ka bynta ba kongsan jong kane ka jingïalang ka dei ka jingkren ai mynsiem ba la ai da u K. N. Raghunandan, Organising Secretary, Vidya Bharati Uchcha Shiksha Sansthan (Higher Education). Ka jingkren ai mynsiem jong u Raghunandan ka pynleit jingmut ha ka bynta ba kongsan jong ka rep ka riang ha ka roi ka par jong ka ri, da kaba batai bniah kumno kane ka kam ka kyntiew ïa ka ïoh ka kot jong ka India lyngba ka jingsaiñdur thymmai, ka jingkiew ha ka teknoloji, bad ka jingkylla ha ki jaka nongkyndong.
Shuh shuh, u la kren shaphang ki jingïaleh bad ki jingjop ba kongsan jong ki jaidbynriew Janjatiya, da kaba kyntu ïa ki samla pule ban ïoh bor na kane ka pateng bad ban ïai bteng ban noh synñiang kaba don jingmut sha ka kam rep bad ka jingkiew ka imlang sahlang bad ka ïoh ka kot jong ka ri.
Kum shi bynta jong ka jingrakhe ïa kane ka sngi, ka CPGSAS ka la pynkup burom ïa arngut ki riew pawkhmat na Meghalaya kiba ki jingjop jong ki ki long kum ka jingai mynsiem: Ka Padmashree Kong Trinity Saioo, kaba la ïoh jingithuh na ka bynta ka jingtrei ba kyrpang jong ka ha kaba kyntiew ïa u shynrai Lakadong, bad ka Kong Margaret Pathaw, ka nongïalehkai arm wrestling ba pawnam jong ka India. La ithuh ïa ki jingnoh synniang ba khraw jong ki ha la ki jong ki jong ki bynta, kaba la pynskhem ïa ka jingsngew sarong hapdeng kiba ïadonlang ha kane ka sngi.
Ka jingrakhe kaba jop ïa ka Janjatiya Gaurav Diwas ka la sakhi ïa ka jingïashim bynta shitrhem na ki samla pule, ki nonghikai bad ki nongtrei, ha kaba la don ki jingïakren kiba jylliew shaphang ka pateng jong ki jaitbynriew riewlum, ki jingpyrkhat halor ka kolshor, bad ki jingïakren ïamir jingmut.
