Shillong, Naiwieng 21: U Myntri Rangbah ka jylla u Conrad K. Sangma ha ka sngi Thohdieng u la pynbna ban pynïar ïa ka Chief Minister’s Research Grant (CMRG) ban kyrshan ïa ki 75 ki nongwadbniah ha une u snem, da kaba ong ba kane ka jingsdang kan pynkhlaiñ ïa ka kam wad bniah ha ki tynrai, ha ka history bad ka kolshor jong ki Khasi, Jaiñtia bad ki Garo.
Haba kren ha ka sngi ba ar jong ka Shillong Literary Festival 2025, u Sangma u la ong ba kane ka prokram ka la kiew na ka jingïalang kaba rit bad mynta ka la kiew sha ka rynsan kaba heh na ka bynta ka thoh ka tar, ki jingai jingmut bad ki jingïasam ïa ki jingtip kiba tei.
“Ha ki por ban wan ngin sa don sa ka jingïakob thoh bad ka Meghalaya ka dei ban long ka jaka ha kaba ka kam thoh ka dei ban long ka bynta jong ka rukom treikam jong ngi bad kumjuh ruh ka kolshor jong ngi,” u la ong.
U Myntri Rangbah u la pynpaw ruh ïa ka jingwanphai ka jingmang kaba T. 133 klur na ki jingpynlut ha kaba ïadei bad ki kam kolshor bad u la pynskhem biang ïa ka jingdonkam ban buh ïa ka Shillong ha ka kyrdan kum ka jaka jong ka thoh ka tar jong ka ri India ban sa wan.
U la ong ruh ba ka kynhun kaba la buh ka la dep ban pynlong ïa ka jingpule kaba jylliew ha kine ki lai tylli ki riewlum kiba don ha ka jylla.
U Sangma u la pyntip ruh ba ïa ka Ward’s Lake kan sa wanrah ka jingpynwandur thymmai da ka jingmang pisa kaba T. 20 klur bad kumjuh ruh ka pisa kaba bynrap kaba long T. 30 klur kumba la khmih lynti.
Ki jingkyntiew kyrdan kin kynthup ïa ka jingbuh ïa ki laser light kaba pyni ïa ka khana pateng jong ka Meghalaya jong ki snem kiba la leit bad kumjuh ruh ki kolshor jong ka.
Ha kane ka sngi ba 2 jong ka Tamasa ki la don ki prokram ba pynlait ïa ki kot kynthup ïa ka River Traveller – Journeys of the Tsangpo-Brahmaputra from Tibet to the Bay of Bengal, Wad ia ka malade (Khasi), European Writing in the Khasi Hills, BSF and Meghalaya – Through the Lens of a Border Man, bad From Isolation to Integration: Geopolitics of India’s Northeast.
Ha ka jingïasyllok ka phang, “Life Beyond the Metro”, ki kaitor kum u Vinay Pathak bad Rajat Kapoor bad u nongshna phlim u Dominic Sangma ki la ïasyllok halor ki jingkylla ki rynsan ha ki cinema jong ka ri India.
U Kapoor u la kren shaphang ki jingïakhun kiba mad da ki nongshna phlim ba shimet da kaba kynthoh, “Ka mynsiem jong ka kam shna phlim ka dang im, hynrei shano ki nongpeit ki don?”.
Ha ka poetry session ki la don ki nongthoh na Garo Hills – kum u Prince S.R. Marak, Sengsime A. Sangma, Jakmatchi M. Sangma, Rhinkle Mrong bad Fivebilson R. Marak.
Ka editor Patricia Mukhim ka la kren halor ka kot ba thymmai jong ka, ka ‘From Isolation to Integration’, pynbud sa kiwei kiwei pat ki prokram.
