Shillong, Naiwieng, 21: U Myntri ka Sorkar Jylla uba khmih ïa ka tnat Jngohkai Pyrthei u Timothy D. Shira, u la ïathuh ba ka Sorkar ka la tei shaid shaid ïa ka jaka ban pynlong ïa ka tamasa Cherry Blossom shabar ka nongbah Shillong.
“Mynta ka jingtrei ka dang ïaid shaid shaid shabar ka nongbah Shillong. Namarba ka kam ka dang ïaid shakhmat, nga ngeit ba tang mynta hi u snem ïa ka tamasa Cherry Blossom yn pynlong ha ka nongbah Shillong namarba ngi don ruh ïa ka jaka kaba biang bha kum ka JN Stadium,” la ong u Shira haba jubab ïa ka jingkylli halor ka jingshah kynthoh ka Sorkar halor ka jingpynlong ïa ka tamasa ha nongbah Shillong kaba la khapngiah.
U la bynrap, “ka jingkynthoh kan don beit manla ka por haba phi leh ïa ki kam kiba bha ruh kan don ka jingkynthoh, haba phi leh ïa ki kam kiba sniew ruh ka jingkynthoh kan don. Ngim kynnoh ïa kito kiba kynthoh ïa ngi ruh, ai ba kin kynthoh. San tylli ki kti kim ïaryngkat. Kumta uwei u lah ban don ïa kane ka jingsngewtynnat ïa ka jingrwai… ki don ki briew kiba don la ka jong ka jingsngewtynnat ïa ki jingrwai.”
U Myntri u la batai ba ka tamasa Cherry Blossom kaba la long mynta ka snem ka la long kaba jop bha, da kaba pynpaw ruh ba ka jur bha ka jingïashim bynta jong ki birew kiba napoh bad nabar jong ka jylla.
“Nga lah ban ong ba ka dei ka tamasa kaba jop namarba ngi ïohi bun bha ki nongjngohkai pyrthei ruh ki wan na shabar ka jylla ban ïashim bynta ha kane ka tamasa Cherry Blossom,” u la ong.
Haba pan jingkheiñ ïa ka jingdon jong ki nongïashim bynta u Shira u la ong, ‘ïa mynta ngam don. Nga hap ban pan da ka kaiphod halor ka jingpoi jong ki nongïashim kiba wan sha kane ka tamasa.
Ha kaba ïadei bad ka tamasa Megong ka ban sa long shen, u Shira u la ong la pynwandur ïa ka jaka kaba kyrpang hapdeng ka Williamnagar bad ka Jengjal ha shilynter ka surokbah National Highway-51.
“Kan long ka jaka ba neh shi junom. Ka don hapdeng ka Williamnagar bad Jengjal harud ka surokbah National Highway-51. Ïa ka tamasa yn pynlong hangne mynta u snem. Kata ka dang don ha ka jingtei. Lehse 75 percent la pyndep bad nga ngeit ba ngin sa lah ban pynlong ïa ka tamasa Megong hangta,” u la bynrap.
Ha kaba ïadei bad ki nongrwai kiba wan nabar ri kiba ïashim bynta ha ka tamasa Megong, u la ong, “Ngam pat tip. Ki don katto katne ki jingtyrwa ban wanrah ïa ki nongrwai nabar ri ruh.”
