Shillong, Nohprah, 02: Ka Dorbar Shnong Nongjrong lyngba u kyrwoh ka la pyntip sha ki paidbah ba ka Nongjrong Viewpoint bad kiwei kiwei ki jaka jngohkai pyrthei kiba don ha ka thaiñ Nongjrong kin khang noh manla ka sngi u Blei naduh u bnai Kyllalyngkot, 2026.
U kyrwoh ba la soi da u Rangbah Shnong ka shnong Nongjrong kaba dang hap hapoh ka Raid Mawshai, Hima Khyrim u Bah Pynshaiborlang Synjri bad u Secretary u Bah Ryntihlang Mukhim, ki la ïathuh ba ïa ki nongjngohkai pyrthei yn ym shah shuh ban rung shapoh ka shnong naduh ka miet sngi Saitjaiñ tad haduh ban da kut ka sngi u Blei bad baroh ki iingbasa ruh kin khang khyrdep ha ki sngi u Blei. Ka Dorbar Shnong ka panmap ïa kino kino ki jingeh kiba lah ban mih ha ka jingthmu jong phi ha ka leit ka wan.
Ïa kane ka rai la shim lang da ka shnong baroh kawei.
Ka jingpyntip sha ki paidbah: Ha Nongjrong, ki nongjngohkai bunsien ki ju ïalum shi jaka ha ka viewpoint ha kajuh ka por kaba lam sha ka jingkhapngiah. Kane ka ju buh jingeh bha ïa ki nongshong shnong bad ïa ki nongwankai. Khnang ban pynbeit ryntih, baroh ki nongwan jngohkai kiba kwah ban sah ha Nongjrong ki dei ban wai lypa ïa ka jaka sah jong ki. Kane ka ïarap ban pynneh ïa ka jinglong ryntih bad ka jingsuk na ka bynta ki nongwan bad ki nongshong shnong.
Lah ban peit ïa ki jaka sah la lyngba ki jingthoh ha ka Google Maps jong ki iingbasa ba la pynrung kyrteng.
Ki daw ka jingkhang ha ki sngi u Blei:
1. Ka imlang sahlang ka donkam ïa ka sngi shongthait kaba kyrpang.
2. Ka jingpynbeit ïa ki paidbah ka la nang kham jynjar.
3. Yn ym don ki jingpynbiang ha ka sngi U Blei, kum ki dukan, ki jaka ieng kali bad ki jingdonkam ba kongsan.
4. Ka jingkhang manla ka taiew kan ïarap ban pynduna ïa ka jingsuhsat bad ban pynneh ïa ka jingsuk ha shnong.
La pdiang sngewbha ïa ki nongwan jngohkai naduh ka sngi Nyngkong haduh ka sngi Saitjaiñ.
“Ngi sngewnguh shikatdeh eh ïa ka jingkyrshan jong phi bad ngi sngewnguh shibun eh ïa ka jingïatreilang jong phi,” la bynrap u kyrwoh.
