U Tarun Bhartiya u dei u nongshon dur bad u nongthaw Documentary Film uba la pawnam ha kylleng ka Ri India bad sha bar ruh kumjuh. La pynlong ïa ka jingpyni nam ïa ki dur ba u shon ha kylleng ki nongbah jong ka Ri India.
Ma u hi da lade u la ïadon bynta ha ki jingpyninam kaba la long ha Ahmedabad.
Mynta kane ka jingpyninam ïa ki kam bad jingtrei jong u, yn pynlong ha Shillong bad ka jaka kan long ha Noel Hall kaba don ha St Anthony’s College ha ka 10 tarik, 11 tarik bad 12 tarik, Nohprah, 2025.
Kane ka jingpyninam kan long ruh ka jingpysah kynmaw ïa ki kam bad jingnoh synñiang jong u ha ki kam shon dur bad ring dur khih Documentary.
La pynlong nyngkong eh ïa kane ka jingpyni nam, kum shi bynta jong ka jingrakhe ïa ka National Photography Festival 2025, kaba la long ha Navijivan Trust ha nongbah Ahmedabad. Mynta kane ka jingpyninam bad ka National Photography Festival 2025 ka wan phai sha nongbah Shillong, kaba long ka nongbah kaba u Tarun u la heh la san bad don la ka jong ka longïing. Kumta kane ka Festival kan ai ïa ki riewdonsap bad kito kiba sngewtynnad ïa ki kam shon dur bad shna Documentary Film bad ïa ki nongshong shnong ïa ki symboh pyrkhat lyngba ki dur bad ki Film kiba u la pynmih bad pyni sha ka pyrthei.
Kane ka jingpyninam ïa ki dur, ka kynthup ïa ka dur jong i Kong Spility Lyngdoh Langrin, ka kynthei kaba shlur bad kaba ïeng pyrshah ïa ka jingtih Uranium bad kaba kyntait ïa ki klur tyngka kaba la tyrwa ha ka lada ka die duh ïa ki lum bad ka khyndew kaba ka shong ha kaba hapoh jong ki u don u marpoh khyndew Uranium.
Ka dur jong i Kong Spility ba u Tarun Bharatiya u la shon, ka shat phalang ym tang ïa ka jingeh rang bad jingskhem jingmut jong ka, hynrei ka pynpaw ruh ïa ka jingshemphang halor ka jinglong jingman jong ka mariang kaba ngi dei ban ïada bad pynneh ïa ka.
Shuh shuh, ka dur jong i Kong Spility ka shat phalang ïa ka mynsiem ïakhun jong ki nongshong shnong jong ka Bri Hynñiewtrep pyrshah ïa ka jingtih Uranium.
Ki katto katne ki pasoh jong ka jingpyninam ka ban long ha Shillong: Kan don ka jingpynlait paidbah ïa ka kot dur kaba la pynbit pynbiang da u Tarun Bhartiya kaba la ai kyrteng “Em No Nahi” kaba la shon bad pynmih da ka Yaarbal Books.
Ha kane ka kot ki don ki dur kiba ïathuh khana ïa ngi shaphang ka khyndew ka shyiap, ka jinglong tynrai jaidbynriew bad ki jingïakhun pyrshah jong ki trai ri trai muluk, kiba u Tarun u la trei shitom ban shon bad lum thup ïa ki.
Nalor ka jingpynlait ïa kane ka kot kan don ruh ka jingpyni ïa ki Documentary ba u Tarun u la shna. Kine ki Documentary Film kin ai ha ki nongpeit ïa ka jingtip bad jingsngewthuh halor ki mat ki jura bad ki jingeh kiba ka Jylla Meghalaya ka ïakynduh. Nangta ka jingïakhun bad jingïakhih pyrshah jong ki nongshong shnong ha kine ki phew tylli ki snem kiba u la trei ha kane ka kam.
Kumta la khot sngewbha ïa baroh ki khynnah shong skul, kiba pule ha College bad University, ki riewïakhun, ki nongïalam bad dkhot jong ki sengbhalang, ki riewdonsap, ki nongrwai, nongthaw jingrwai, nongleh bad nongshna sawangka, ki nongdro, nongshon dur, nongshna film bad kiwei ba kin wan khnang sha kane ka jingpyninam. Kane ka jingpyninam kan plie ïa ki khmat bad jingmut jingpyrkhat jong ngi.
Ïa kane ka jingpyni nam la pynlong da ka jingkyrshan bad jingïatreilang jong ka Department of Mass Media and the North East India AV Archive, St Anthony’s College, Shillong.
