Shilong, Nohprah, 18: Ka Khasi Students Union (KSU) ryngkat ka jingïatreilang bad ka Khasi Students Union (KSU) Mawlai Circle bad ka Khasi Students Union (KSU) NEHU Unit ka la plie paidbah ïa u durmot jong u Myllung Soso Tham ha ka jingrakhe ïa ka lyngkhuh sngi ïap kaba 85 snem ka jong u, ïa uba la pynieng hakhmat ka Central Library jong ka skulbah North Eastern Hills University, Shillong.
Shwa ban plie paidbah ïa u dur mot, ki dkhot ka KSU bad kiba ïashim bynta ha kane ka sngi ki la ïaid paidbah ryngkat bad ka tem ka put naduh Gate-2 ter ter shaduh ka phyllaw jong ka Central Library.
Ha kane ka sngi, la sakhi lang da ki nonghikai ka skulbah NEHU, ki bahaing hasem jong u Myllung Soto Tham, u President ka KSU u samla Lambokstarwell Marngara, ki dkhot ka KSU kiba rim bad kiba mynta bad kiba la shah khot sngewbha.
U Bah Jyrwa haba kren kum u kongsan u la ong, “haba ngi leit skul mynshwa ngi pule ïa ki Poim jong u Myllung Soso Tham, ha kito ki por ba dang leit skul ngim da sngewthuh eh, ngi shu pule bad leit thoh eksamin hynrei ngim da pynleit jingmut eh ïa ki kyntien ba u la thoh bad dei ynda ngi la heh ki kyntien jong u Soso Tham ki la shongsbai ha ki jngmut jingpyrkhat jong ngi.”
“Na ka bynta jong ngi, haba don ki jingïaleh ki jingïakhun teng teng ngi duh mynsiem. Hynrei haba ngi ïohi ïa ki jingthoh jong u Myllung Soto Tham ki ai mynsiem ba ngim dei ban sangeh, ngim dei ban tieng, ngim dei ban sangeh ban ieng ïaleh na ka bynta ka ri bad ka jaidbynriew,” u la ong shuh shuh.
U la pynkynmaw ruh ba ki jingthoh kiba ka KSU ka ju thoh ha ki Banner da kaba sot na ki poitri jong u Myllung Soso Tham ki dei ki jingkyrsiew thiah.
Ha kjat u durmot ba shi ryngieng, la thoh ruh ïa ka kyntien poitri jong u Myllung Soso Tham, kiba ong, “Ngi im pat ha kiwei ki sngi, aiu ngin leh namar ka ri.”
Haba kdew ïa kitei ki kyntien, u Chairman ka NESO u la ong, ‘kine ki kyntien ki long kum ka jingkylli ïa ngi shimet shimet ba ngi im hangne ha sla pyrthei, aiu ngin leh namar ka ri. U synniang aiu ba ngi la noh na ka bynta ka jingshong shngaiñ jong ka pateng ba mynta bad ka pateng ka ban sa wan.”
“Ïa u Myllung Soso Tham la kha ha ka spah snem kaba 19, u khlad ha ka spah snem kaba 20 bad ma ngi mynta ha ka spah snem kaba 21 ngi dang ïakren ïa ki jingthoh jong u, kaba pyni ba ki dang long kiba shongsbai haduh kine ki sngi bad ki dang long ki jingthoh kiba kit jingmut haduh kane ka khyllipmat namarba u long u briew uba ïohi jngai,” la bynrap u Bah Jyrwa.
Halor ka jingbym pat urlong ka Inner Line Permit bad ka MRSSA u Bah Jyrwa u la kyntu ïa ka KSU ba ka dei ban leh eiei khnang ban pynurlong ïa kane ka jingdawa jong ki paidbah ka jylla hadien ba ka iingdorbar Thawaiñ ka jylla ka la mynjur ïa ka Resolution ha ka 19 tarik Nohprah, 2019.
Kum shibynta ka jingrakhe ia ka lyngkhuh sngi iap kaba 85 snem jong u Myllung Soso Tham ka Khasi Students’ Union (KSU) Laban Circle, kynthup ruh ka KSU Lawsohtun Unit bad ka KSU Sengkmie ki la plie paidbah ia ka Hall jong ka Soso Tham Memorial Secondary School kaba don ha ka shnong Lawsohtun.
Ia kane ka Hall jong ka skul, la plie da u Chairman jong ka North East Students Organisation (NESO) u Bah Samuel Jyrwa uba la long kum u Kongsan ha ryngkat ka jingiadonlang u President jong ka KSU u samla Lambokstar Well Marngar uba la long kum u Symbud kongsan, u Chairman jong ka Managing Committee u Bah Daniel Khyriem, u Secretary u Dr. A. Rani, u Rangbah Shnong ka Lawsohtun u Bah Harribert Rynjah, ki dkhot ka KSU Laban Circle bad Lawsohtun Unit, Principal jong ka skul bad ki nonghikai.
Ha shwa ban plie paidbah ia ka Hall jong ka skul ka la don shwa da ka jingbuh syntiew ia u durmot jong u Soso Tham ba la tei pynsahnam ha phyllaw jong kane ka skul.
