Shillong, K’lyngkot, 07: Ka Synjuk ki Rangbah San Shnong Manad Area ka la pynpaw ïa ka jingsngewkhia kaba jur halor ka jingbym shimkhia jong ka MeECL Mawkyrwat Division ban maramot ïa ki post electric kiba la sarang bad sator kiba pynsyier ïa ka ïaid ka ieng ki paidbah khamtam ha ka por lyiur ba jur bha u slap naba bun na ki longïing ki hap ban sah sha ki ïing ki para marjan namar ka jingtieng ïa ki sainar electric kiba kem ding ha ka por ba jur bha ka lyer.
Katkum u kyrwoh ba la phah da u President ka Synjuk u Bah Redy Shylla bad u Myntri ka shnong Manad u Bah Lyngdoh ki la ong ba la jan dap 40 snem ka jingwan sieh ïa ki post electric ha kane ka thaiñ hynrei kaba sngewsih ka long ba haduh mynta kam shym pat don ka jingmaramot ïa kine ki post electric ba la sator.
Kumta na ka liang ka Synjuk ka dawa na ka Meghalaya Energy Corporation Limited ban shimkhia ïa kine ki jingeh jong ki thaiñ Nongkyndong da kaba maramot kloi ïa ki post electrict kiba la sarang bad ban pynkynriah noh ïa ki post electric kiba don marjan bad ki iing briew namarba ka buh jingma ïa ki paidbah.
Ka synjuk ka dawa ruh ki Lineman kiba dei peit ïa kane ka thaiñ ba ki dei ban don ha kine ki shnong ym ban sah ha kiwei ki jaka kiba jngai na kane ka thaiñ khamtam ha ka por lyuir namarba lada don kano kano ka jingjia ba kyrkieh kan ym buh jingeh ïa ki paidbah.
