Shillong, K’lyngkot, 12: U Myntri ka tnad Pule Puthi ka Sorkar Jylla u Bah Lahkmen Rymbui u la pynpaw ïa ka jingbym thikna halor ka rai jong ka Meghalaya Transport Corporation (MTC) ban sangeh noh ïa ka jingshakri ki School Bus naduh ka 1tarik, Ïaiong, 2026.
“Ngim pat peit bniah balei ka MTC ka la sangeh. Kumta, tad haduh bad lymda nga tip ïa ka daw, ka long kaba eh bha ïa nga ban kynthoh halor kata,” ong u Bah Rymbui ha ka Lah Sngi u Blei haba jubab ïa ka jingkylli halor ka rai jong ka MTC kaba la pynmih ïa ka jingsngewkhia na ki kmie ki kpa la kin dang lah neem ban siew ïa ka bai kali ne ban shaniah ha ki Bos STEM bad kiwei kiwei ki kali shimet.
Hynrei u Myntri u la kdew ïa ka jingpyrshang jong ka Sorkar ban weng ïa ka jingdheng kali bad ban kyrshan ïa ki khynnah skul da kaba kdew ïa ka jingpyllait paidbah ïa ki bos STEM ar snem mynshwa da u Myntri Rangbah ka jylla u Conrad K Sangma.
“Nga sngewnguh shibun ïa u Myntri Rangbah ka jylla namarba ar snem mynshwa u la pyllait paidbah ïa ki bos STEM kiba la ïarap shikatdei eh,” la ong u Bah Rymbui da kaba pynpaw ïa ka jingshaniah ba ka Sorkar kan pynbun ïa ka jingdon jong kine ki bos.
U Bah Rymbui u la banjur ïa ka jingshimkhia jong ka Sorkar ban shakri paidbah bad u la ong, “ka dei ka kamram jong ka Sorkar, ka Sorkar ka dei na ka bynta ki paidbah.”
U la pynthikna ba lada ki bus STEM ki paw ba ki long kiba ai jingïarap, ka Sorkar kan pynbun ïa ki ha ki bnai bad ki snem ban wan.
