Shillong, K’lyngkot, 13: Ka Hynñiewtrep National Youth Front, (HNYF) South East, Sohra Circle ha ka sngi Baar ka la buddien halor ka jingai Trading License da ka Khasi Hills Autonomous District Council (KHADC) ïa ka North Eastern Security Service Private Limited (NESSPL) kaba la jop ïa ka Tender ban pynïaid ïa ka kam pahara ha National Institute of Technology (NIT) Sohra la lap ba kane ka Agency ka la pyndonkam da kajuh ka Trading License kaba ba la ai ban thep tender ha DGAR, Laitkor.
Ha ka jingïakren bad ki lad pathai khubor hadien ka jingïakynduh ïa u Chief Executive Member (CEM) ka Khasi Hills Autonomous District Council (KHADC) u Bah Winston Tony Lyngdoh, u nongaiktien jong ka HNYF u Bah Banjop Khongwir u la ïathuh ba u CEM u la pynshai ba ka North Eastern Security Service Private Limited (NESSPL) ka la shu leh thok da kaba pyndonkam da kajuh ka Trading Licence ban thep ïa ka tender.
“U CEM u la ong ruh ba un sa phah ïa ki ophisar na ka tnat Enforcement ban pynlong ïa ka jingtohkit kaba bniah halor kane shwa ban shim ïa ka sienjam wat la ka dei ban ujor da ka ejahar pyrshah ïa ka Agency,” la bynrap u Bah Khongwir.
