Shillong, K’lyngkot, 14: Uwei u Home Guard Volunteer uba don bad ka Madanriting Traffic Branch u la shah kem ha ki Pulit hadien ba kawei ka video ka la saphriang ha kine ki khyndiat sngi ha social media ha kaba la kynnoh ba u donkti ban dawa pisa jong ki nongjngohkai pyrthei kiba wan kai sha nongbah Shillong.
U Superintendent of Police ka East Khasi Hills u Bah Vivek Syiem ha ka jingïakren bad ki lad pathai khubor ha ka sngi Baar u la ïathuh ba u Home Guard Volunteer u dei uba la tip kyrteng kum u Reconsent Kharlor, 35 snem ka rta.
U SP u la ïathuh ba kane ka jingshah dawa pisa ki nongjngohkai pyrthei ka la jia ha ka 26 tarik, Nohprah 2025 ha ka por 9.30 baje mynstep ha Saw Lad, Shillong.
Ha ka jingtohkit, u SP u la ïathuh ba u Home Guard Volunteer u la phla ba kawei ka kali Maruti 800 rong lieh ka la pynher sted bad ka la tynrah salit ïa u bad kumta u la kthong da ka Scooty bad ïoh bat ha Happy Valley bad ynda u la rung hapoh ka kali jong ki u la dawa pisa shi lak hynrei ha ka jingïakren ki nongjngohkai pyrthei ki la siew ïa u T. 15 hajar ïa kaba ym shym la pyntip sha ka Traffic Branch bad ka pisa ruh kam shym la rung ha ka jingbuh jingkhein jong ka Traffic Branch namarba ka dei ka kam kaba u la leh tang marwei.
Ha ka jingkhmih bniah ïa ki CCTV, ki Pulit ki lap ba kam dei satia kumba u la kynnoh ba ka kali ka tynrah ïa u bad ka dei tang ka nia shu thaw.
Ki Pulit ki la kem ïa u bad la pynngat ïa u ha ki kyndon aiñ bapher bapher kum ka kyndon dawa pisa, ka kyndon kren ktien khlemakor bad kiwei pat ki kyndon bad pyntip ruh ba ïa u Home Guard Volunteer yn sa tian bishar ha Kashari.
U SP u la ïathuh ba ïa u Reconsent Kharlor u dei uba la ïoh khusnam na ka tnat Pulit namarba u la ïoh bat teng ïa ki nongkhaïi drok.
