Shillong, K’Lyngkot, 15: U Myntri Rangbah ka Jylla u Conrad K. Sangma u la ong ba ka Sorkar Jylla kan ym leh jubor ban wanrah ïa ka lynti Rel sha rilum Khasi bad Jaiñtia khlem da ïasyllok shwa bad ki kynhun bapher bapher.
Ha ka jingïakren bad ki lad pathai khubor ha ka sngi Palei u Myntri Rangbah u la ong ba ka Sorkar Jylla ka ladep thaw ïa ka All Party Committe on Railways hynrei bun na ki seng saiñpyrthei kim shym la poi sha ka jingïalang ban ïakren halor ka ishu lynti Rel la kin pdiang ne ki kyntait.
“Nga la kren da kaba shai halor ka lynti Rel. Nga la ju pynpaw ruh la bunsien ba kane ka dei ka mat kaba khia bha bad kum ka Sorkar ngi kren da kaba shai tad haduh ban da don shwa ka jingïakren bad ka jingïasyllok bad ka jingmynjur lang kumno ban ïaid shakhmat ryngkat lang,”u la ong.
“Ngi la thaw ïa ka komiti bad ngi la khot ïa ka jingïalang jong ki seng saiñpyrthei ban ïakren halor kane ka kam hynrei ym shym la don satia na kano kano ka seng saiñpyrthei kaba la wan shakhmat hynrei don napdeng jong ki, kiba la phah sha ngi da ka jingthoh ba kin ym ïashim bynta satia ha ka jingïakren,” la ïathuh u Sangma.
“Ngi hap ban sngewthuh la ngi mynjur ne ngim mynjur tad haduh ba ngin da pynlong ïa ka jingïakren, ïa mynta hi ngim pat poi shaei shaei ruh. Lada phim kwah ban kren ruh bad ha kajuh ka por haba ngi pyrshang ban leh eiei phin sa ong balei phi leh bad balei phim ïasyllok shwa bad ngi. Kata ka dei ka kam kaba eh ban ïaid shakhmat,” la kynthoh u Sangma.
“Ngin sa pyrshang ban khot lang ïa baroh ban ïakren. Ngin sa pynshai sha ki paidbah shaphang ki jingmyntoi halor kane bad ngin sa pynshang ban pynshai ïa ki jingsngewkhia bad ngin sa peit lada ngi lah ban poi sha ka jingïamynjur khnang ba ngin dup lah ban rah (ïa ka kaiphod) sha Delhi,” la pyntip u Myntri Rangbah.
