Shillong, K’lyngkot, 17: Ka Kong Bindas Syiem, kaba la shong shah thngan hakhmat ka Secretariat ban dawa siang rong ïa ka surok Nongpoh kaba pynïasoh shaduh ka shnong Umden Nongtluh ka la pynpaw ïa ka jingsngewsih kthang ban lap ba ka la don ka jingtrei torti ïa ka surok.
Tang shu ïohi ïa ka lyngkhot video kaba la pynsaphriang ha social media, mar mar ka Kong Bindas Syiem lem bad kiwei pat ki longkmie bad ki riewrangbah ka la hiar jurip da lade ha ka sngi Saitjaiñ ïa ki bynta ba la siang rong torti ïa ka surok ha ka shnong Plasha.
Ha ka jingïakren bad ki lad pathai khubor, ka Kong Bindas ka la ong ba kum ka longkmie kaba la len ïa lade ban shah thnang na ka bynta ban ïoh ïa ka surok rong kaba thymmai ka dap da ka jingsngewsih halor ka jingpyntrei torti ïa ka surok.
Ka la kynthoh ba kum kane ka jingpyntrei torti ïa ka surok ka long ka bym lah ban pdiang namarba kane ka surok ka dei ka surok kaba pyndonkam da ki paidbah nongleit nongwan ha ka pang ka shitom bad ka long ruh kaba sngewsih ban ïoh kum kine ki kam leh torti.
Ka la ïathuh ruh ba ïa kane ka jingpyntrei torti la lap teng ha ka por ba la thep ïa ki Humpipe ha kaba la ujor sha u Contractor ha ka surok kaba hap ha jan ka shnong Plasha bad mynta ruh ha ka por ba la siang rong ruh la lap ïa ka jingleh toriti kaba paw shisha ïa ka jingtrei torti.
Ka Kong Syiem ka la ong ruh ba ha ka jingwan jurip u Manager jong u Contractor u la kular ban leh bha ruh ha ki bynta ba siang rong torti bad ha kajuh ka por ruh ka la kyrpad ïa u Contractor ba um dei ban shuh leh torti bad dei ban leh janai bad ka jingïoh ïa kane ka surok kam dei ban pynsngewsih ïa ki paidbah nongshong shnong jong ka thain bad ka dei ban ai jingkmen ïa ki paidbah.
