Shillong, K’lyngkot, 23: U Myntri ka Sorkar Jylla uba khmih ïa ka tnat Pule Puthi u Bah Lahkmen Rymbui u la kyrpad ïa u Prof. Sumarbin Umdor ba un shimti biang ïa ka kamram kum u Pro Vice-Chancellor jong ka North Eastern Hill University (NEHU) da kaba pynpaw ba ïa ka shithi iehnohkam jong u kaba u la aiti ha ka 15tarik, Nohprah, 2026 ym pat shym la pdiang satia.
Kane ka jingkyrpad jong u Bah Rymbui ka long hadien ba ki kynhun bapher bapher na ka skulbah NEHU dang shen kiba kynthup ïa ka NEHUSU, ka KSU-Unit, ka NEHUNSA bad ka NEHUTA ki la ïakynduh ïa u Myntri Rangbah ka Jylla u Conrad K. Sangma ban tuklar lem halor ki kynrum ki kynram na ka jingbym don u Vice Chancellor u Prof. PS Shukla la 422 sngi.
“Nga kyrpad ïa u Prof. Sumarbin Umdor ba un shimti biang ïa ka kam khnang ba ka jingpynïaid kam ha Shillong Campus kan ym thud bad kan ïaid beit kumba ju long,” la ong u Bah Rymbui bad ïathuh ba ka jinglong jingman kaba la jia ha skulbah NEHU ka la ktah haduh katta katta ïa ka pule puthi jong ki samla pule, ïa ki nonghikai bad ïa ki nongtrei.
Dang shen ki kynhun na ka skulbah NEHU ki la kyrpad ruh ïa ka Pro-VC jong ka Tura ban shimti kum ka Acting Vice Chancellor.
U Bah Rymbui u la ïathuh ruh ba ka Sorkar Jylla ka ladep pynsngew ruh sha ka Sorkar Pdeng ban khmih ba kynrum kynram hapoh ka skulbah NEHU ka dei ban kut noh kham kloi.
“Ka Ministry haduh kine ki sngi kam pat ai ktien eiei kumta kumba ka long mynta ka jinglong jingman ka dang sah kumjuh bad ngi tip ba u Pro-VC jong ka Shillong Campus u Prof. Umdor u la aiti ïa ka shithi iehnohkam hynrei haduh kine ki sngi ym pat pdiang. Ngi la tip ruh ba ka don ka jingpynwit ïa ka Pro-VC jong ka Tura ban wan shane sha Shillong (ban shimti kum ka Acting-VC. Lada ym don Acting VC ha Shillong ka NEHU kan shah ktah la ka long ïa ka pule puthi, ne ka jingsiew ïa ki nongtrei ba la ai kontrak ne ki muster roll bad kiwei kiwei.a Shisien ba ka la ktah ïa ka shlem treikam jong ka nongbah Shillong, kan ktah haduh 70 tylli ki kolej kiba ïasoh ha ka jylla,” u la ong.
“Namar ba ym pat lah ban poi sha ka jingpynbeit ba pura bad naduh ba la risaiñ u Pro-VC jong ka Shillong ym shym la lah ban pyntyllun ïa ka kam. Nga kyrpad ïa u Prof Umdor ba un wanphai biang ban shimti ïa ka kamram khnang ba ka jingpynïaid beit ïa ka jaka pule ha Shillong kan ïaid beit ïaid ryntih,” u la bynrap shuh shuh.
“Nga kyrmen ba ka Sorkar Pdeng bad ka Ministry of Education kin wanrah ïa ka jingïapynbeit kaba neh shijunom,” la pynpaw u Myntri.
Halor ka jingkylli, u Bah Rymbui u la kyrpad ïa u Prof Umdor ban buh hakhmat eh ïa ka bha ka miat jong ki samla pule bad ki nongtrei, da kaba ong, “nga buh ïa ka jingkyrpad ym namar kano kano ka mat hynrei ka mat ka dei ka bha ka miat jong ki samla pule bad ka bha ka miat jong ki nongtrei. Dei na kata ka daw ba katba dang ap ïa ka rai ba khatduh ba la shim da ka tnad, ka kham bha ïa u Pro-VC ban shimti ïa ka kam.”
