Shillong, Rymphang, 06: Ki bahaing hasem jong ki nongbylla tih dewiong kiba la mynsaw na ka jingbthei u dynamite ha ka krem tih dewiong beaiñ ha ka shnong Mynsngat, Thangsko, East Jaiñtia Hills Distrirct kim shym la treh satia ban ïakren eiei bad ki lad pathai khubor halor kane ka jingjia.
Katkum ka jingpyntip jong ki Pulit ka East Jaiñtia Hills Distrirct ha ka sngi Palei ki la don haduh 18 ngut ki nongbylla kiba la duhei ïa la ka jong ka jingim ha kane ka jingjia.
Ha ka jingbuddien jong u nonglum khubor ka Batesi TV, u la don sa uwei pat u nongbylla tih dewiong uba la mynsaw jur bad uba la khladnoh ha ka sngi Thohdieng hapdeng ka jingshah sumar ha NEIGRIHMS Hospital, Shillong ïa uba la tip kyrteng kum u Nor Bahadur uba la 35 snem ka rta uba dei na ka ri Nepal.
Katkum u kyrwoh ba la phah da ka Executive Director jong ka Meghalaya State Disaster Management Authority (MSDMA) la pyntip ba ka jingïap jong ki nongbylla tih dewiong ka la kynjoh sha ka 25 ngut bad 8 ngut kiba la mynsaw.
U Myntri ka Sorkar Jylla uba khmih ïa ka tnat Revenue and Disaster Management u Bah Lahkmen Rymbui bad u Myntri ka tnat ka Koit ka Khiah u Bah Wailadmiki Shylla, ka MLA ka Kong Santa Mary Shylla, u Principal Secretaryka tnat Home (Police) u Bah FR Kharkongor ki la hiar sha ka shnong Thangsko ban lum jingkhein halor kane ka jingjia.
Ki kynhun ai jingïarap kiba dang don haduh mynta ha Thangsko ki kynthup ïa ka Search and Rescue Team, ka kynhun NDRF, SDRF, bad ki shipai BSF.
Nalor kine, ki la don ruh ki ophisar na ki distirct jong ka jylla Asam kata na Cachar bad Halaikandi kiba ïatreilang kynthup ruh ki kynhun ki doktor.
Kumba ka long mynta ki shipai khyndew bad ki shipai suiñ ki la long kiba pynkhreh lypa ban leit ai jingïarap lada donkam.
