Babu Kular Khongjirem
Lah i danda, ithamula bad i komik hi khait ban peitkai ïa ka jingïatainia jong ki nongmihkhmat paidbah jong ngi mynnin ka sngi la ka long ha Ïingdorbar Assembly ne ha Ïingdorbar District Council. La i kumba kam dei shuh ka dorbar kyntang hynrei ki pynlong ïa ka la kum ka iew luri-lura pynban.
Ki nongmihkhmat paidbah ba la kham rangbah (senior member) lei lei, i kumba ki leh kum ki khynnah ki khyllung pynban. Ha ka jaka ba kin tem ïa ka jingïakren, kine ki senior member ki kylla long pynban kum ki nongai ding ne nonglur phlang ne nongthang prew shuh shuh khnang ban kham meh ne kham khluit shuh shuh ka ding.
Hynrei kaba kham phylla bad artatien eh ki paidbah ka long ba na ka jingkren bad ka jubab u Chief Minister halor ka ILP, imat, ka ILP ka lah ban LIP noh syndon artad hapoh kane ka sorkar MDA-I ne MDA-II. Ka shai kdar ba ka Sorkar Delhi kam suitniew ne kam salia ïa kine ki nongïalam na Meghalaya.
U Chief Minister lem bad ka kynhun Minister jong u ki la phla shai kdar ba ki la leit ïa kynduh bunsien ïa u Central Home Minister, Amit Shah bad Prime Minister hynrei kim lah pynkohnguh ne pynngeit satia ïa ki ban ai ILP ha Meghalaya. Ym tang katta, hynrei u la pynher ruh shibun tylli ki jingthoh ne shithi sha u Modi bad Amit Shah hynrei kim salia, kim burom, kim niewkor bad kim treh jubab satia kaba shai ïa ki.
Nalor kata, u la phla ruh ba ka sorkar India ka pyntreikam ha baroh ki para state riewlum jong ka North East ka India kum ka Manipur, Nagaland, Arunachal Pradesh, bad kiwei kiwei hynrei kam treh ai pat tang ïa ka Meghalaya marwei. Kane ka la pyni shai kdar ba u Chief Minister ka Meghalaya bad ka kynhun jong u ki la kut ka buit ka bor jong ki bad ki la pheil ruh kum ki nongïalam jong ka Sorkar Meghalaya hakhmat ka sorkar India.
Kat u Chief Minister bad Deputy Chief Minister kiba ïalam ïa ka sorkar kin sdang ban khynniat pynban ïa ka jingkitkhlieh sha ki MLA paidbah jong ka Liang Pyrshah ba kin leit ïa kynduh noh ma ki ïa u Amit Shah bad u Prime inister Modi sha Delhi. Kane ka la kylla long pynban ka kam biej, ka kam khyllung khynnah bad ka kamkai kat ïa ka kambah kam san kaba ktah ïa ka ïap ka im jong ka jaitbynriew jong ngi bad kaba khia thew shi katdei eh hynrei ki lehkai pynban.
Ka jingïatai nia mynnin ka sngi ka pyni bad paw penryngkew lut syndon ka jinglong nongïalam jong ki. Ki paidbah ki nang mut ba ki dei ki nongïalam kiba stad bad shemphang shisha, phewse! ki pyni pynban ba ki dei nongïalam ba taddor, kiba khluid biej bad ba la synshar ïa ka jingsngew jong ki da ka jingdom bad jingsngew bitar pynban.
Lada kum kine ki jait nongïalam kin dang synshar ha ka state jong ngi, ka lawei jong ka state bad ka jaitbynriew jong ngi kan long lypa kaba dum hadien habud.
Ki kham pynleit jingmut ïa ka roi ka par ban pynsngew bang ïa ki paidbah bapli da kaba kob sarong ba ki ai bad pyllut ym shuh da ka hajar klur bad da ki lak spah klur hynrei da ki spah hajar billion syndon khnang ban pynthamme bad pynbiet ïa ki paidbah ba lui lui( bapli katba ïa ki kam ba shisha pat kiba ktah mationg shisha ïa ka ri bad ka jaitbynriew kum ka ILP, ka Ktien Khasi ha ka 8th Schedule bad kiwei kiwei ki leh klet, kim salia bad kim kheinkor satia.
Ka ladei ka por ïa ki paidbah ban bishar bniah ïa ki nongïalam bad nongmihkhmat jong ki. Kumba khluit bad long ki nongïalam jong ki, kumta ruh kan bud ryngkhi bad bit ruh ha ki party ba ki ïalam ma ki ïa ka.
Hato, dang lah neem ban pynkhie im biang ïa ka jinglong kyntang ka synshar khadar ha kane ka synshar paidbah ha kane ka ri jong ngi nangne shakhmat. Ngi ieh ïa kane hakhmat ki paidbah ba kin ïa bishar bad puson bha.
