Shillong, Rymphang, 24: Ka Federation of Khasi Jaiñtia & Garo People (FKJGP) Upper Shillong Circle ka dap da ka jingsngew sarong kaba khraw hadien ba i Kong Aihun K Lyngdoh Tron iba long i nongshong shnong jong ka Shnong Umlyngka, Upper Shillong iba trei pat kum ka Nongthoh khubor ka Jylla ha ka thaiñ East Jaiñtia Hills District iba bat ruh iaka kyrdan kum ka Senior Correspondent jong ka Lad pathai khubor jong u Mawphor & Highland Post lyngba ka jingiohpdiang jong i ia ka khusnam “Best Journalist of Meghalaya” ha ka 20th Media Excellence Award 2026 kaba la pynlong da ka Media Federation of India ha PLB Auditorium, ITO, ha New Delhi.
U kyrwoh ba la phah da u President ka FKJGP Upper Shillong Circle u samla Kitboklang Nongphlang u la ong, i Kong Aihun K Lyngdoh Tron lem bad kiwei pat ki nongthoh bad nongpathai khubor na kylleng jong ka ri India iba long tang ma i marwei na ka jylla Meghalaya iba la iohpdiang ia katei ka khusnam ha kaba la sam da u Director General barim jong ka Indian Institute of Mass Communication (IIMC) u Prof. Sanjay Dwivedi, ha ryngkat ka jingdonlang u Senior Journalist u Prateek Trivedi bad u Deputy Director General jong ka National Informatics Centre (NIC) u Dr. LP Sharma.
Ka FKJGP Upper Shillong Circle ka sngew ban ai mynsiem shuh² ia i Ka Kong Aihun halor ka jinglah ka jong i ban noh synñiang ha ka kam thoh khubor bad khamtam ban pynsaphriang ia ki jingtip bad ia ki khubor ki bapher bapher sha ki paitbah jong ka jylla Meghalaya ha kine ki 11 snem jong ka jingshakri ka jong i. Kane ka jingioh khusnam ka jong i Kong Aihun K Lyngdoh Tron ka long ka burom kaba khraw shikatdei eh ym tang ia i shimet hynrei iaka Shnong ka thaw, ia ka thaiñ Upper Shillong bad kumjuh ruh iaka jaitbynriew bad ka jylla hi baroh kawei.
Ka FKJGP Upper Shillong Circle ka phah ruh iaka jing khublei Kitbok kitrwiang ha ryngkat ka jingkyrkhu kyrdoh ia i Kong Aihun K Lyngdoh Tron ba in nang ioh ia ka met kaba koit kaba khiah ha ryngkat ka jing stad bad jing shemphang khnang ba in nang lah ban shakri khambha iaka jaitbynriew lyngba ka kam kaba I trei khnang ba kan long ruh ka nuksa ba bha ha ryngkat ka jing ai mynsiem ia kiwei pat ki paralok kiba don ha ka kam thoh bad kam pathai khubor.
