Babu Kular Khongjirem
Mynta,la mih sa kawei ka mat kaba eh bha bad kata ka long la ka sorkar ka nud neem ban pynduh pyndam ïa ka jingïateh soskular bad ka Indian Hotels Company Limited ban shna ïa ka Taj Resort & Spa ha ka dewlynnong Lumpongdeng kaba don hapdeng ka pung Umïam ne pung Damsite.
Hadien ba la mih ka jingïakhih shah thngan ba la pynlong da ka Green-Tech Foundation (GTF) pyrshah ïa katei ka kam thmu lilam ka sorkar MDA I &II sha ka Company kaba nabar jylla, ka la mih ka jingpynshai na ka Sorkar lyngba u Chief Minister bad u Deputy Chief Minister (Khasi Hills) jong ka Meghalaya ban pynksan jubor ban pynngeit ne pynbiej ïa ki paidbah ba bun.
Ha kaba nyngkong u Chief Minister u pynshai ba katei ka Taj Resort ha Lumpongdeng ka long tang ka jingtei shipor. Kata ka jingtei shipor kan long pat haduh 50/60 snem. Hadien ba la pynshai bad pynphai nia kylla da ka GTF, lyngba ki sakhi da ki kot ki dulir lyngba ka RTI, u Chief Minister u la sdang ban kylla ktien pat. Tang hadien shi sngi ba u la pynshai ban shna bad tei Resort shipor (temporary structure) ha Lumpongdeng, u la kylla ktien noh ba ka Sorkar kam don jingthmu ban tei Resort ha Lumpongdeng hynrei la pynkynriah noh sha ka jaka ba don ka Orchid Umïam. Ha Lumpongdeng yn shu shna dara tang ban ïoh leh byrngia da ki Tourist.
Kumno u Chief Minister u ai jingpynshai shi sngi da kawei ka jingkren bad sa shi sngi pat da kawei pat ka jingpynshai. Don aiu ha lyndet jong kane ka jingpyrshang tap eitmiaw bad pynksan jubor kine ki nongïalam kane ka sorkar MDA. Ban ai wai shipor sha ki Company kiba shabar bad khlem burom shuh ïa ka Meghalaya Land Transfer Act,1972 kam dei satia ka kamkai ne ka kam kaba malu mala. Ka lah ban don ka jingïasngewthuh jingmut sop sop bad kine ki nongïalam bad kane ki Company. Phim lah ruh ban ong ba lehse ka company ka la ïoh ban ai bhah (shares) lem sha kiba ki la pynïoh ïa katei ka jaka. Lada ki la kum shim shisha ïa kata ka bhah sopsop (illegal shares) na ka Company, lada kin pyndam bad pynkut noh, ki dei ban pynphai noh ïa ka bhah (share) jong ki lada ki kum pdiang na katei ka Company. Ban pynphai ïa kaba lah ïoh, ka shait eh bha, wat tang shi hajar ne ar hajar ruh. Lada da ki klur lei, kata, sa tang ban shu pyneh ïa ïap ïa im beit triang bad pynksan jubor justi katba jia katba long.
Phim lah ban ong, lehse, kane kadei kawei na ka daw ba kine ki nongïalam sorkar jong ngi kim da salia than ban shimkhia ïa katei ka jingshah thnganjong u President jong ka GTF watla u la tlot palat mynta.
Hynrei, namarba kine ki nongsynshar ki dei ki nongïalam ba la jied da u paidbah kumta ki dei ban don ka jingkitkhlieh ban pyndem ha ka sur jong ki paidbah lada ki paidbah ki ïa tylli shisha, lym kumta, ma ki bad ka party jong ki kin sa shah ktah jur ym tang ha ka By-MP Elekshon ka ban sa long shen na 1-Shillong Parliamentary Constituency hynrei khamtam eh ha ka General MLA Election ka ban sa long ha u snem 2028.
