Shillong, Jymmang, 18: Ka jingphah ka Sorkar ia ki Pulit ka kynhun SF-10 sha ka shnong Lapangap ryngkat ka jingsynran lang ki Pulit ka West Jaiñtia Hills ka la pulom pynban namarba ka jingpyrshah ki Karbi ia ki nongrep ka shnong Lapangap bad kiba pynibor ruh da kaba siat da ki jri siat sim ia ki nongrep kiba tur sha ki lyngkba kiba don markhap bad ka shnong Tahpat, West Karbi Anglong District, Assam.
Ha kane ka jingjia ha ka Lah Sngi u Blei uwei u nongrep ka shnong Lapangap u la mynsaw na ki bynta jong ka khlieh hadien ba u la shah siat da ka jri siat sim ha ki Karbi.
Ki Pulit ka Assam ki la wan tur kumba 500 ngut sha Lapangap ban tem ia ki jingiakynad hapdeng ki Karbi bad ki Khasi Pnar.
Ka jingangnud jong ki nongrep ban hiar sha lyngkha ka la pulom wat haduh mynta ba la jan dier ka aiom ban bet ki symbai.
Ki jingpynibor jong ki Karbi ia ki nongrep ki la jia katba ki bor synshar ka West Jaintia Hills bad ka West Karbi Anglong ki dang pynlong ia ka jingiakren ha ka ktem sah shipor ki Pulit Assam ha u Lum Pynthor. Ka jingiakren ka long hapdeng ki saw ngut ki nongmihkhmat na ka Shnong Lapangap hapoh ka jingialam jong u Waheh Shnong u Bah Deimonmi Lyngdoh bad saw ngut na ka liang ki nongmihkhmat ka shnong Tahpat.
Ha ka jingiakren bad ki lad pathai khubor u Deputy Commissioner ka West Jaintia Hills u Abhinav Kumar Singh ula iathuh ba ha ka jingiakren, ki nongialam jong ki Karbi kiba mihkhmat ha ka jingialang ki kular ba kin ym pynthud satia nangne shakhmat lada ki nongrep ka shnong Lapangap ki hiar sha ki lyngkha rep.
U la ong ba ka jingphah ia ki Pulit sha Lapangap ka long ban pynneh ia ka shongsuk shongsain bad ba kan ym mih kano kano ka jinghuri hura kaba lah ban ktah ia ka jingim jong ki paidbah.
“Ka jingiakren ka long kaba biang. Ki nongialam ka Lapangap ki la kren shai ba kin ailad beit kumba ju long naduh ki por mynshwa bad katkum ka rai jong ka dorbar shnong ban shah ia ki Karbi ban rep ha ki jaka rep ba don shajan ki lyngkha ka shnong Lapangap, hynrei kim bit pat ban thung ia ki tynrai dieng ne kino kino ki jingthung kiba neh shi jurom,” ula ong.
“Ki nongmihkhmat na ka shnong Tahpat ki la kular ba kin ailad ia ki nongrep jong ngi ban leit sha ki lyngkha bad na ka liang jong ki Karbi na Tahpat kin ym pynthud satia,” la ong u DC.
