Hadien ba u Chief Executive Member jong ka Khasi Hills Autonomous District Council u la batai ïa ki kam kiba ïa dei bad ka Centre of Learning, Knowledge and Services lane ka COLKS kaba shim wai na ka bynta ban pynïaid ia ka Khasi Traditional Medicine Institute kaba don ha Lum Sohpetbneng, kane ka shlem treikam ka la pynshai ïa ki jingkynthoh jong ka KHADC ïa ki kam kiba ïa dei bad kane ka shlem treikam katkum ba la paw ha kawei na ki lad pathai khubor ha kane ka jylla.
Halor ka jingkynthoh ba ka COLKS kam shym la treikam la kumba ar snem eiei hadien ba la aiti ha ka bad ba la shu ieh iing jah khlem nongpeit nongsumar bad khlem nongtrei ia katei ka jaka kaba la tei ha ka jinglut kaba 9.47 klur tyngka bad ïa kaba la ai wai ha ka dor 6 lak tyngka shisnem, ka COLKS ka la pynshai ba ka la shim wai ha ka 26 tarik u Naitung 2023 hynrei ha ka por ba ka shimti, ki jingtei jong ka Khasi Traditional Medicine ki dei ki bym bit bym biang, ka bording ruh kam don, ka um ruh kam don, ki jaka leit bar ruh kim biang bad ki kynroh ruh kim don. Kine ki dei ki kamram jong ka District Council kaba dei ka trai ban pynbit pynbiang shuwa ban ai wai hynrei watla katta ruh ha ka 12 tarik u Kyllalyngkot 2024, ka COLKS ka la thoh sha ka KHADC ban tyrwa ba kan pynbit pynbiang hi ma ka ia kine ki jingdonkam baroh.
Ka COLKS ka la kam ruh ba ka la iarap ia ka KHADC ban pynioh bording sha kane ka shlem treikam bad la ioh bording ha u Rymphang 2025 kata hynnniew bnai hadien ba la shim wai. Ka um ruh ka jynjar bha ha kane ka jaka bad kane ka buh jingeh ia ki nongtrei kiba sah hangne. Ka la pyntip ruh ba ka la don ka jingshah prongtuh ha ka shi tarik u Kyllalyngkot 2025 namarba kim don satia ki kynroh ki ban ker ia kane ka shlem treikam bad ka la don ka jingduhnong kaba khraw ia ka COLKS ha kaba ki mar kiba rem dor ki la shah tuh. Ka COLKS ka la duhnong ruh na ka daw ka jingpom pyrthat bad ka la ktah ia ka bording bad kiwei pat ki tiar ki tar bad ka daw ka dei namarba ka District Council kam shym la buh da ki Earthing kiba biang.
Shuh shuh ka la kdew ba kam shym la don ka jingiakut ne ka jingiabuh sngi bad ka District Council ia ka sngi ban sdang pyntreikam ia ka Khasi Traditional Medicine namarba ka la don ka jingiakren sngewthuh ba ki dang don bun ki jingduna kiba dang hap ban pynbit pynbiang shuwa bad ka KHADC ka la ai No Objection Certificate ruh ia ka COLKS ha ka 23 tarik u Kyllalyngkot 2025 ba kan pyniar ia ki kam jong ka ha kane ka jaka. Hynrei naduh u Nohprah 2025, ka KHADC kam shym la ai ktien eiei shuh ia ka COLKS watla ka la pyrshang bunsien ban kren ia kane ka mat.
Ka don ruh ka jingkynthoh na ka District Council ba kam shym ioh jingmih eiei na ka COLKS naduh ba la ia soi ia ka soskular ai wai watla ka District Council ka la phah kumba saw ne san tylli ki shithi jingpynkynmaw sha ka COLKS ba ka dei ban siew noh ia ka pisa kaba sah hynrei ka COLKS kam jubab eiei. Halor kane ka COLKS ka la ong ba ka jinglong jingman jong ka Khasi Traditional Medicine ka la dei lypa ka jingeh ia kaba yn ym pat lah ban pyntreikam namarba hap ban pynbit pynbiang shuwa ia baroh ki jingdonkam, ka COLKS ka la thoh ruh sha ka District Council ba ka dei ban ym kheiñ bai wai na ka bynta khatphra bnai ia kaba la ia mynjur watla ym shym la pynrung da ka jingthoh ia kata ka jingiamynjur ha ka soskular hynrei ka dei beit tang ka jingiakren ia kaba ka KHADC ruh ka la mynjur ia kata ban sangeh kheiñ bai wai haduh u Nohprah 2025. Ka la kyntait ia ka jingkam jong ka KHADC ba ka COLKS ka khlem ioh jubab ia ki shithi jingpynkynmmaw ban siew ia ka bai wai.
Nangta ka la don ruh ka jingkynthoh na u Chief Executive Member jong ka Khasi Hills Autonomous District District Council ba ka Khasi Traditional Medicine Commission ka khlem tip eiei bad kam shym la don jingiakren eiei ban ai wai sha ka COLKS bad kane ka pynsah lyngngoh kumno la ai wai. Halor kane pat, ka COLKS ka la jubab ba ha ka 26 tarik u Naitung 2024 ka la ioh ban shim wai ia kane ka jaka kaba saw akar kaba don ha Lumsohpetbneng lyngba ka Expression of Interest ba ka District Council ka la pyllait ha ka 14 tarik u Nailur 2023 ban khot ia kino kino kiba kwah ban pyniaid ia ka Khasi Traditional Healing and Wellness Centre bad hadien ba ka COLKS ka la phah ia ki jingtyrwa jong ka na bynta kane ka Project, ka KHADC ka la ibit ban ai sha ka. Ka la pynshai ba ha ka por ba ka phah ia ka EOI, ka Khasi Traditional Medicine Commission ka la kut noh ka samoi treikam jong ka hynrei la thaw thymmai pat haduh ka 20 tarik u Nohprah 2023.Kumta ka jingkynnoh ba ki dkhot ka KTMC kim don jingtip kam shym mih shuh bad ka dei tang ka jingialam bakla.
Sa kawei pat ka jingkynthoh ka dei ba ka COLKS kam shimkhia ia ka kam. Halor kane ka COLKS ka la pynshai ba ka la shong bun tylli ki jingialang bad ki nongsumar Khasi ban ia syllok kumno ban pyniaid ia ki kam ha kaba ia dei bad ka jingai jingsumar ia ki briew bad kumjuh ruh ban ai jinghikai ne ban pyntbit shuh shuh ia ki. Ka la thoh ruh sha ki bor ba dei peit ba kin phah briew ban mihkhmat sha ka Project Committee hynrei ym shym la jubab ia ki. Ka la kyntu ia ka District Council ba shuwa ban pynmih ia kine ki jingkynnoh pyrshah ia ka COLKS, ki la dei ban peit bniah shuwa ia ki kot ki sla namarba kine ki jingkynnoh ki ialam bakla pynban ia ki paidbah.
