Shillong, Jylliew, 30: Da ka sienjam ban bud ia ka thong USD 10 Billion ha shwa u snem 2030, ka Sorkar Jylla hapoh ka jingialam jong u Myntri Rangbah u Conrad K Sangma ki la jam shakhmat na ka bynta ban kyntiew ia ki kam jngohkai pyrthei kaba antad ba ka lah ban aikam haduh kumba 50,000 ngut ha ka shisnem bad nohsyniang ruh haduh 4.1% sha ka Gross State Domestic Product (GSDP) jong ka Jylla.
Ia ki kali, u Myntri Rangbah u la pyllait paidbah ha ryngkat ka jingdonlang u Myntri ka Tnat Tourism ka Sorkar Jylla u Bah Paul Lyngdoh bad kumjuh ruh u Dr. Vijay Kumar D. Commissioner and Secretary ka tnat Tourism Department, ka Kong Renette C. Sohkhlet kaba long ka Secretary jong ka tnat Tourism ka Sorkar Jylla.
Kane ka sienjam ka long ban pynbiang ia ka jingbun ka jingtuid ki nongwan jngohkai sha kane ka jylla kiba kwah ban ioh ia ka jingshakri kaba paka, ka leit ka wan kaba kham aram haba ki leit sha ki jaka jngohkai pyrthei. Katei ruh kadei shi bynta ban pynbiang na bynta kito ki nongwan jngohkai kiba pynkhreh ban pynlut shibun ka pisa la ka long ha ki jaka bad ha ka leit ka wan haba ki wan ban shangkai pyrthei sha kane ki jylla. Hynrei, hadien ba la wad bniah na ki paidbah bad ruh na ki Tourist Operators bad ka tnad Tourism la lap ba nalor ka jingdon ki kali ban leit ki nongjngohkai ka Meghalaya ka duna bha ka jingdon ki kali kiba biang na bynta kito ki nongjngohkai pyrthei kiba kham bit kham biang nalor ki nongniah kiba donburom naka bynta ban kyntiew shuh shuh ia ki kam jngohkai pyrthei ha ka jylla.
Dei na kane ka daw ba ka sorkar jylla ka la pyllait paidbah da ki kali kit nongjngohkai pyrthei kiba paka na bynta ki nongseng kam lajong kiba iadei bad katei ka bynta.
U Myntri Rangbah haba kren ha ka jingialang u la pynpaw ia ka jingkmen kaba khraw bad ong, “Ngi dap da ka jingkmen ban ioh pyllait paidbah ia ka PRIME Tourism Vehicles Scheme, kaba dei ka sienjam shakhmat ban kyntiew ia ka kam jngohkai pyrthei. Da kaba pynbiang ia ki kali pura ryngkat ki nongniah kiba don burom bad ba la tbit bad buh hakhmat eh ia ka jingshngaiñ jong ki nongshong, ngin ai ka jingshakri kaba paka kaba ki nongwanjngohkai kin sah kynmaw ia ka jingwan jong ki. Kane ka sienjam ym tang ba kan kyntiew ia ka ioh ka kot jong ka jylla hynrei kan pynkup burom shuh shuh ia ki nongseng kam lajong bad ruh ia ki nongniah kali kiba la tbit kumta kane kan kyntiew lut ha baroh ki liang.”
![](https://batesitv.com/wp-content/uploads/2023/06/IMG-20230630-WA0000-1024x575.jpg)
U Bah Paul Lyngdoh haba bynrap halor kane u la ong, “haba ngi pyllait paidbah ia kine ki kali, ngi sdang ruh ia ka lynti ka jingkyla ban pynlong ia ka Meghalaya kum ka Jylla kaba paka tam eh na bynta ki nongwan jngohkai pyrthei. Lyngba kine ki kali kiba kham biang, ym tang ba ngi ai kamai hynrei ngi plie lad plie lynti ruh na bynta ka kam kamai na ka jingitynnad ka mei mariang bad ruh ki paidbah Meghalaya.”
Lyngba kane ka skhim, ka Sorkar Jylla ka kyrshan pisa haduh mar shiteng ka dor kali ha ka jingmang pisa kaba 6 klur tyngka. Kane ka jingkyrshan pisa ka kynthup haduh 90 persen ka jingsiew ba nyngkong ka dor kali (down payment) kaba pyntikna ba ki nongioh jingmyntoi kin ioh ia katei ka kali kaba la paka da kaba siew shwa tang 1 lak tyngka ka bai seng ne down payment. Nalorkata la siew tam ruh 20 persen ka jingsiew kaba man u bnai ban pynsuk ia ka jingtreikam. Kane ka skim ka thmu ruh ban pynbiang shuh shuh ia ka jingdonkam ki nongwan jngohkai kiba kham bit kham biang la ka long naduh ki kali, ki nongniah kiba tbit, ki nongialam kai, ban suk wai kali ha ka dor sorkar bad ruh ban thaw pat ia ki lad kamai.
Kum ka jingsdang kaba iaid tang shi bnai katei ka skim ka la ioh pdiang ia ka jingtyrwa kaba haduh 600 ngut kiba kwah ban pyntreikam ia katei ka prokam jong ka sorkar. Hynrei ha kaba sdang la jied shwa tang 47 ngut lyngba ka jingbishar kaba bniah da kaba peit shwa ia ka jingtbit jong ki halor ka kam jngohkai bad tip ia ka lynti bad ka leit ka wan kaba shngain kaba kum ki nongniah ki donkam ban tip. Na ka liang ka tnad ka pynlong ruh ka jingai jinghikai na bynta jong ki khnang ba kin sngewthuh kumno ban buh shwa hakhmat ia ka jingshngain jong ki nongshong..
Nalorkata, ka sorkar kala pyndait ruh da ki GPS ha kitei baroh ki kali ban suk ban buddien ia ki lada jia ba don kano kano ka jingjia ba kyrkieh. Ka PRIME Tourism Vehicle Scheme, jong ka tnad Tourism ka sorkar jylla kala sam ruh ia ki life jackets, first aid box bad ruh ki jingialehkai sha ki nongpyniaid ia ki jaka jngohkai pyrthei kiba don ia ki jingialehkai ha um. Ka la don ruh ka jinghikai da kaba treilang bad ka Tour Operators na ka bynta ki nongking lieng bad ruh ki jinghikai ban pyllait im bad ruh ka CPR na ka bynta kito kiba wan sha ki jaka jngohkai kum sha Shnongpdeng, Sohra, Darrang, Dawki, Umsyiem, bad kiwei.