Shillong, Nailar, 04: Ka Dorbar Shnong Lawsohtun ha ka sngi Thohdieng ka la aiti da ka dorkhas ha ka Deputy Commissioner jong ka East Khasi Hills ka Kong Rosetta M. Kurbah halor ka jingdawa ban pyrkhing da ki kyndon ïa ka Mahadev Khola bad ban khanglad ïa ka jingklun jaka da ki briew kiba wan nabar jylla.
Ha ka jingïakren bad ki lad pathai khubor u Rangbah Shnong ka Lawsohtun u Bah Harrybirth Rynjah ula ïathuh ba ka Dorbar Shnong ka la pyntip hakhmat ka Deputy Commissioner ba ka Mahadev Khola kam hap satia hapoh u pud u sam jng ka Dorbar Shnong Lawsohtun hynrei ka hap hapoh ka jingpeit jong ka tnat Forest.
“Naduh ki por mynshwa ka Mahadev Khola ka pawnam bha ha ka jingjyllei ki kam sniew bad kane ka dei namar ka jingbym don ki kyndon ban pyrkhing ïa ka jingbuhai shnong jong ki briew kiba wan nabar ka jylla” la ong u Bah Harrybirth.
U la ïathuh ba ka Mahadev Khola ka don shabar jong ka wah Umjasai bad ka khlaw ka btap bad ka long kaba donkam bha ban pyrkhing ïa ka jingwan buhai shnong bad ka jingtei ïa ki jait jingtei be-aiñ ban lait na ka jingpynjakhlia ïa ka wah ne ïa ka khlaw.
U Rangbah Shnong u la ong ruh ba ka Dorbar Shnong ka pyrshah jur ïa ka jingkwah jong ki nongpeit ïa ka Mahadev Khola ban pynkylla sha ka jaka sah briew ha kane ka jaka namar katkum ka jingïateh ha ki snem baladep, la ai jaka tang ban tei ïa ka Mandir ym ban pynlong ïa ka jaka sah briew.
Haba kylli, u Bah Rynjah u la ïathuh ba ka Deputy Commissioner ka la kular ban shimkhia ïa kane kam bad ïathuh ruh shen kan sa don ka Joint Committee ban pynbeit ïa kane ka kam bad ka la pyntip ruh lada donkam yn sa khot lang ïa ka dorbar shnong Lawsohtun ban ïakren ha kane ka jingïalang.
Ha ka sngi Palei, ka Khasi Students Union, Laban Circle ka la aiti da ka jingthoh ha u Principal Chief Conservator of Forest (PCCF) u RS Gill da kaba dawa ba dei ban kyndang naphang ïa ki ing ba la tei be-aiñ ha Mahadev Khola.
Tang hadien katto katne kynta, ki dkhot ka seng bad ki ophisar jong ka tnat Forest ki la leit jurip ruh ïa ki ing ba la shna be-aiñ ha Mahadev Khola.
