Ribhoi, Nailar 5 : Ki Pulit jong ka Ribhoi District ki la iohkem ia ki hynniew ngut ki Garo kiba donkti ban lute ia ki ar tylli ki jaka tylliat maw, kawei kaba don ha Umduba bad kawei ha Umnowe Killing kaba hap hapoh ka Khanapara Police Station, Ri Bhoi District.
Kine ki ar tylli ki jaka tylliat shoh maw ki la shah lute ha ka kynhun ki runar kiba la kieng atiar bha ialade ha ka 22 tarik u Jymmang, 2023, bad ha ka 11 tarik u Naitung, 2023. Na kine ki ar tylli ki jaka, kane ka kynhun ka la ioh lute kumba T. 85,400 hajar ka pisa na Umduba plant bad T. 1,90,000 na Umnowe Killing plant. Ha kaba iadei bad kane ka jingjia, ki Pulit ki la register case hapoh ka Sections 395, 398, 397, 402, 506, 458, bad 34 jong ka Indian Penal Code ha Khanapara Police Station.
U Superintendent of Police jong ka Ri Bhoi u Giri Prasad u iathuh ba ka tnat Pulit ka la thaw ia ka Special Investigation Team ban pynlong ia ka jingtohkit kaba bniah bad ban lum ia ki sakhi sabut na kine ki ar tylli ki jaka bad ban ithuh durkhmat ruh ia ki runar kiba donkti ha kane ka kam bymman.
Da ka jingtrei shitom, ka Special Investigation Team ka la iohkem ia ki hynniew ngut ki briew kiba sah ha ka shnong Umduba ia kiba la tip kyrteng kum u Kandil Marak, u Rechi Momin, u Wilsh Marak, u Robert Momin, u Marus Marak, u Bimod Marak bad u Collin Marak.
Ha ka jingtohit, ki Pulit ki la ioh kurup ruh ia ki tiar siat bad ia kiwei kiwei ki tiar ba la pyndonkam da kane ka kynhun ki nonglute kiba kynthup ia kawei ka suloi rifle ba la shna hi, ar tylli ki pistol ba la shna hi, 4 song u gunpowder, kawei ka Air gun, 12 tylli ki tupia, ka jain ba la pyndonkam ban thep ia u gunpowder, 9 tylli ki sopti shipai, 9 tylli ki patlun shipai, 10 tylli ki jain tap khmat, 8 tylli ki juti but shipai, 3 tylli ki pla, kawei ka muja rong lieh bad kawei ka pla ba iong.
