Nongtoiñ, Nailar 07: Kawei ka longkmie kaba dang 21 snem ka rta kaba sah ha ka shnong Nongtraw, kaba hap hapoh ka West Khasi Hills District ka la duhei ïa la ka jong ka jingim hadien ba la suba jur ba ka la shah pyniap dusmon ha ki briew kiba ym pat lah satia ban tip haduh mynta.
Katkum ka thymmei khubor ba la ioh lum na ki bor synshar shnong jong ka shnong Nongtraw la ong ba kane ka longkmie kaba la tip kyrteng kum ka Bibimoris Lyngkhoi 21 snem ka la shah pyniap ha ka miet jong ka 5 tarik, Nailar, 2023 bad la iathuh ruh ba kane ka longkmie ka shong ka sah lang bad la u jong u kurim jong ka bad shuh shuh la iathuh ruh ba ha kane ka miet ki dang lang baroh arngut shikurim ha ing.
La iathuh shuh shuh ba ha ka por kumba 12 eiei mynmiet u kurim jong kane ka longkmie u la leit khot bad pyntip sha la u hymmen ba ka Kong Bibimoris ka la khladnoh bad hadien ba ki bahaïing hasem ki la leit sha ka ïing sah ban leit peit ia kane ka longkmie ki la lap ia ki dak ki shin na ki bynta jong ka met jong ka kaba la pynsuba sniew halor ka jingiap jong kane ka longkmie.
Na ka liang jong ki bahaïing ki la pyrshang ban tohkit na u kurim jong ka hynrei la ong ba u kurim u la pyrshang ban jubab da kumne kumtai bad kham hadien u la shu jah rngai bad phet krad noh na kane ka jaka bad ha kaba iadei bad katei ka jingjia ki bor pyniaid shnong jong ka shnong Nongtraw ki la pyntip noh ia kane ka jingjia sha ki Pulit kiba la hiar sha ka shnong Nongtraw ban pynlong ia ka jingtohkit kaba bniah ban lap ia ka jingshisha.
Ïa ka met jong kane ka longkmie la pynkit noh sha Nongstoiň Civil Hospital, ban pyndep ia ka post-mortem bad kat haduh ba la pynmih ia kane ka kubor ym shym la tip satia ia ka daw jong ka jingiap kane ka longkmie bad ia u kurim ruh ym shym la lap satia naduh ba u la jah rngai.
Ha kaba iadei bad kane ka jingjia ki Pulit ki la register case hapoh ka Section 302 jong ka Indian Penal Code (IPC) bad ka jingtohkit ban lap ia ka jingshisha ka dang iaid shakhmat.
