Shillong, Naiwieng, 20: Kum shi bynta ban kyntiew ia ki samla donsap jong ka jylla ha ka rwai ka siaw shaduh ka international Level sa shi sien biang ka Ka Don Bosco Media Network (DBMN) kan pynlong ia ka jingiakop rwai kaba la tip kum Sur Kynud (The Voice)
Ha ka jingiakren bad ki lad pathai khubor ha ka lah sngi U Blei u Bah OL Marbaniang uba long u dkhot jong ka shlem treikam ka Don Bosco Media Network u la pyntip ba jingmut jong kane ka Reality Show ka long ban kyntiew ia ka sap ka phong jong ki kaitor ban rah ia ki shaduh ka International Level bad ia kito kiba kwah ban nang ban rwai lyngba ka jinghikai jong ki Coaches bad ruh kiba dei ki Judge jong kane ka rynsan iakop rwai.
U la iathuh ba ka rukom pyniaid ia kane ka rynsan iakob rwai ka long kum ka rynsan iakob ‘The Voice’ ba la pyniaid shabar jong ka ri India.
Ka Blind audition kan sa long ha ka 2 tarik, Noprah 2023. Ki nongrwai kin hap ban pynkhreh kawei ka jingrwai kaba ki jied katba ki kwah ban rwai. Lada ki Coaches/Judges ki jied ia u/ka nongrwai ban iaid sha ka kylla kaba bud ne ka Elimination Round-1. Ia u/ka nongrwai kin hap jied ia u/kawei na ki Coach/Judge ban hikai ia u/ka ban rwai. U/ka nongrwai kim donkam shuh ban siew ia ka bai shah hikai ha u/ka Coach/Judge. Ban shah hikai, u/ka nongrwai bad u/ka coach kin hap ban ia pynbeit ia ka por bad katno sien shitaiew kin ioh ia ka jingshah hikai ka ban sa long ha Don Bosco Youth Centre, Laitumkhrah, Shillong.
Kin sa don ki Elimination Round naduh 9 tarik Noprah 2023 terter haduh ban da poi sha ka Grand Finale ka ban long ha ka 31tarik, Kyllalyngkot, 2024 ha Don Bosco Youth Centre, Laiumkhrah, Shillong. Kito kiba la shah jied na ka Blind Audition, kin sa ioh jinghikai na bynta ka Elimination Round kaba bud bad kito ki bym shah weng ha ka Elimination Round-1, ki sa ioh jinghikai ban iakhun sa sha ka Elimination Round-2 bad ter ter haduh 10 ngut yn jied ban iakob ha ka Grand Finale.
Ha ka Grand Finale ki Coaches/Judges kin ym ai Marks shuh hynrei kin don ki External Judge ne ki nongbishar ba shabar ki ban bishar ia ka jingiakob. Naduh ka Elimination Round-1, ki Views ha YouTube ruh ki ai Marks nalor ki Marks ba la ai da ki Coaches/Judges.
Ka bai registration kan long shi hajar tyngka bad ki nongiashim bynta kin dei tang ki nongshong shnong jong ka Jylla Meghalaya.
Ka khusnam na ka bynta ka jingiakob ka long T.1 lak bad u/ka lahduh kin long ki Brand Ambassador jong ka Don Bosco Media Network ban ioh iashim bynta ha ka International Level kum ka Vocal Star ne ‘The Voice’ ki ban sa long shabar jong ka ri India. Kin ioh ruh ban rekod bad Videograph ar tylli ki jingrwai ba la shna hi ha kaba ka Don Bosco Media kan siew ia baroh ki jinglut jingsep.
Ki phorm lah ban ioh na Reception Don Bosco Youth Centre ne lah ban shim na ka FB/Instagram/YouTube jong ka Don Bosco Media Networ bad na ka bynta ki jingtip kiba bniah lah ban telephone ha u number: 8119011043 ne thoh da ka Whatsapp ne da ka email sha makrisdb@gmail.com
Ha u snem ba ladep ka heprit Chevinia Mawnai ka la long ka nongjop ha ka rynsan iakob rwai bad ka la jop ruh ia ka Vocal Star kaba la long ha United Kingdom.
