Shillong, Naiwieng 29 : Sa tang khyndiat taiew shwa ba ka pyrthei baroh kawei kan pynkhreh ia ka lehniam Christmas, ka shnong Moolamylliang kaba don ha rilum Jaintia bad kaba hap hapoh ka East Jaiñtia Hills district ka la ioh pdiang ia ka khusnam “IconSWM-CE Excellence Award 2023” ha ka jingialang “13th International Conference on Sustainable Waste Management & Circular Economy and IPLA Global Forum 2023” kaba la long ha nongbah Mumbai ha ka 29 tarik, Naiwieng 2023.
Ia ka khusnam la aiti sha u Rangbah Shnong jong ka shnong Moolamylliang u Bah Apmon Pachang, da u Consul General jong ka Kingdom of Netherland u Bart De Jong bad u President jong ka ISWMAW u Sadhan Ghosh ryngkat kiwei de ki kynrem ki lyndan.
Na kane ka jylla Meghalaya la sakhi lang ia kane ka jingioh khusnam jong ka shnong Moolamylliang da u Environmental Engineer jong ka Meghalaya State Pollution Control Board u Bah S Syiem ryngkat u Principal jong ka Synod College Shillong u Dr. RM Lyngdoh.
Kane ka shnong ka dei kaba la paw bha ha kane ka jylla bad ha ki katto katne ki bynta jong kane ka Ri India, na ka jingkhuid jong ka bad khamtam ha ka Aiom Christmas, ka dei ka por kaba khring bha ia ki paidbah na kylleng ka jylla ban leit jngoh ia kane ka shnong khamtam ynda la dum ka suin bneng, namar naduh ki khyndiat snem mynshuwa, tang ha kane ka shnong la lah ban sakhi ia ka jingrakhe Christmas kaba long baroh shi aiom, da kaba pyndait ia ki bording kiba thaba jingshai laiphew jaid ha baroh kawei ka shnong.
Hapoh ka jingialam jong u Rangbah Shnong bad kiwei de ki nongkit kam, ka shnong ka la thung ia ki tynrai dieng ha ki kyndong kynshrot jong ka shnong bad rakhe ia ka Christmas ha ka rukom kaba pher na kiwei pat kaba long ka jingkyrshan lang jong ki nongshong shnong.
