Shillong, Rymphang, 24: Ka Ingbishar Meghalaya High Court ka la aibor ïa uba shah kynnoh pynbthei bom ba un pan jamin na ka Special Court.
Ha ka rai ba la pynkut noh ïa ka jingujor ba la mudui da u Wallam Jingsuk Barim, ka Division Bench kaba kynthup ïa u Chief Justice S. Vaidyanathan bad u Justice W. Diengdoh ka la ong, “ha ka jingshem, la lap ba kam don dor ha ka jingpynksan nia jong u nongmudui, ngi sngew ba ïa ka jingmudui yn hap ban pynkut noh. Nalorkata, ïa ka mukotduma Crl.M.C.No.108 of 2023 la pynkut bad u nongshah mudui u don ka hok laitluid ban pan jamin na ka Special Court.
“Lada jia ba don kum kane ka jingpan jamin, la khmihlynti ba ka Special Court kan pyrshang ban leh kumjuh bad ba kan pynkut noh ïa kane ka kam khlem kano kano ka daw na ki jingshem ba la kdew hangne,” ong ka Ingbishar.
Ka bench ka la ong, “watla ha kaba sdang ngi dang pyrkhat ba pynslem ïa ka jingmynjur bad pynpaw ïa ki jingsngew jong ngi ha kaba ïadei hapoh ka Open Court, bad buh teng shwa ban pynmih ïa ka hukum bad da kaba bishar ïa kiba bun ki rai jong ka Supreme Court bad kiwei kiwei ki High Court bad ïa ki nongrim jong ka aiñ, ngi la pynkylla noh ïa ka jingmut jong ngi, kaba ailad ha kaba ïadei bad ka jingpynbna ba la pynmih da ka Supreme Court halor ka mukotduma jong u Kushalbhai Ratanbhai Rohit bad kiwei kiwei pyrshah ïa ka Sorkar Gujarat, ba la pathai ha ka AIR 2014 SC 2291, kaba kdew ba shisien ba la soi ïa ka hukum, ka la la long ka rai khatduh bad ka Section 362 Cr.P.C. ka dei ka rai bad ka Iingbishar kam lah shuh ban dang pynkylla ïa ka rai, hynrei, lada ym pat soi, ka Ingbishar ka la shah pynkup bor ban pynkylla ïa ka jingsngew.”
Ïa u nongshah mudui la pynngat kyndon ha ka 29 tarik, Naitung, 2022 hapoh ka Section 120B IPC pule lang bad ka Section 6 jong ka Explosive Substance Act, 1908.
U Wallam u la pan jamin na u Special Judge (NIA) hynrei ka kashari ka la kyntait ban ai jamin ha ka 22.09.2022, 09.03.2023 bad 21.08.2023. Hadien kata, u nongshah mudui u la leit sha Ingbishar High Court ha kaba la shim kum ka Bail No.48 of 2023 bad ïa kane la weng noh ha ka 28.09.2023 da kaba aibor ïa u nongshah mudui ba un pan biang da ka jamin kaba thymmai.
Katkum u nongshah mudui, ym don satia kino kino ki tiar kiba pynshisha ba u nongshah mudui u don ïa ki tiar pynmynsaw, ïa kaba la ong ba u dei u dkhot jong ka seng kieng atiar Hynñiewtrep National Liberation Council (HNLC) bad kam don kano kano ka hukum ban set along hapoh ka Unlawful Activities (Prevention) Act, 1967.
U nongshah mudui u la shah set ha Judicial Custody naduh shi snem, khyndai bnai bad arphew san sngi katkum ka tarik ban la phah ïa kane ka aplikeshon ha ka 13.12.2023 bad ka jingtian bishar ka kynthup ïa ki 64 ngut ki nongsakhi, kaba pyni ba ka jingtian bishar kan dang shimpor bad ka jingshah set jong u nongshah mudui ha Judicial Custody kan ktah ïa u nongshah mudui uba la pynkhreh ban ïada ïalade ban ïoh ïa ka jingbishar kaba hok.
Ka hukum ka ong ba u Special Judge um shym la ïaroh ïa ka jingkyrpad jong u nongshah mudui ba um don eiei satia bad ka seng HNLC. Wat hapdeng ki jingpynshisha ba la pynpaw ban kyrshan ïa ka jingpan jamin, ngi sngewkhia pat tang ha kaba ïadei bad ka jingpynslem ban pdiang ïa ka jingkyrpad bad katkum u nongujor, ka don ka jingpynslem haduh 114 sngi ban ujor.
“U Special Judge (NIA) u la kyntait ïa ka jingpan jamin ba khatduh eh ha ka 21.08.2023 bad ynda la ïoh pdiang ïa ka Certified Copy jong ka hukum kaba 13.09.2023, ïa ka Bail Application No.48 of 2023 la phah sha kane ka Ingbishar, kaba la pynkut noh da kaba ai ïa ka hok ïa u nongshah mudui ban pan da kawei pat ka jamin kaba thymmai. Yn ïaiban biang ba ka jingpynslem haduh 114 sngi ym tang kaba ktah ïa ka jingsngew jongno jongno lait noh ïa u nongshah mudui, uba shah set along la jan ar snem,” la ong ka Ingbishar ha ka hukum.
