Shillong, Rymphang 24: Ka shlem treikam jong ki Muktiar ne ki Nongiasaid aiñ ka jylla kaba la tip kum ka Shillong Bar Association (SBA) kaba don ha lyndet ka DC Office ka la kem ding kynsan ha ka sngi Saitjaiñ ha ka por kumba 10:30 baje mynmiet eiei bad ka jingpluh jong ka ding ka la long kaba ishyrkhei bha.
Ki Pulit ka Fire and Emergency Service (F&eS) tang shu ioh jingtip halor kane ka jingjia ki la leit mar mar ban tem ia ka ding kaba klang.
La sakhi ruh ba ki thylliej ding barhem ki la bamduh ia ka ing treikam baroh kawei nalor ba ka dei lypa ka ing dieng kaba la rim bha.
Kat haduh ba la thoh ia kane ka khubor ym pat lah satia ban ioh jingtip halor ka jingkem ding jong kane ka shlem treikam ki Muktiar bad ym pat lah satia ban ioh jingkheiñ halor ki jingjulor.
Ki nonglum khubor jong ka Batesi TV ki dang don ha kane ka jaka ban lum ia ki jingtip kiba kham bniah halor kane ka jingjia.
Ngin sa nang wanrah shuh shuh ia ka khubor kaba bniah ynda la iohlum shuh shuh ia ki jingtip kham hadien katto katne por.
