Shillong, Rymphang, 24: Ka Meghalaya State Commission for Women ka la pynrem jur ia ka jingjia ba dang shen ha ka jylla Assam pyrshah ia kawei ka riewniam kaba trei ha rilum Garo hadien ba ka la shah pynhiar shiteng lynti na ka Bos katba ka dang mih na Dudhnoi ban leit sha Goalpara, Assam.
“Kum kine ki jingjia ki ktah haduh katta katta ia ka lanot, kum ka kynthei bad kum ka riewniam. Namarkata, ka Commission ka kyntu ia ka Sorkar Meghalaya bad ia ka Sorkar Assam ban iatreilang bad ban pynthikna ba ki briew kiba donkti ki dei ban ngat ha ka jingshah pynshitom,” la ong ka Commission lyngba u kyrwoh ba la pynmih ha ka sngi Palei.
“Ka Meghalaya ka dei ka jylla kaba kynthup lut ia baroh ki paidbah kiba don ha la ki jong ki jingngeit, bad ngi kyrshan ia ka jingailaitluid halor jingngeit katkum ka riti synshar jong ngi. Ngi dei ban pynthikna ba ka jingpdiang ia ka jingngeit niam bad ka jingburom markylliang ka dei ban long hapdeng ki paidbah nongshong shnong jong ki ar tylli ki jylla bad ngin iai bteng ban imlang hapdeng ka jingsuk jingsain,” la bynrap ka Commission.
“Ki Sorkar jong ki ar tylli ki jylla ki dei ban pynthikna ban pynneh pynsah ia ka shongsuk shongsain bad ba ki briew kiba donkti ki dei ban shim ia ka jingkitkhlieh halor ka jingbym burom khamtam ia kino kino ki riewniam,” la ong shuh shuh ka Commission.
