Shillong, Rymphang, 16: Ka Khasi Students Union (KSU) Bangalore Unit ha ka sngi Thohdieng ka la pynsngew ha u Myntri ka Sorkar Jylla uba peit ïa ka General Administration Department u Rakkam A. Sangma halor ka jingbym don ka Meghalaya House ha ka nongbah Bangalore, Karnataka namar kaba la buh jingeh haduh katta katta khamtam ïa ki samla pule bad ïa ki nongshong shnong ka jylla Meghalaya kiba leit sha ka Jylla Karnataka na ka bynta ki kam ki duk.
Ha ka jingïakren bad ki lad pathai khubor, u General Secretary barim ka KSU Bangalore Unit u samla Amos Syiemlieh u la ïathuh ruh ba ka don ka jingdkoh ha ki snem baladep namar ka jingbym ai jaka jong ka Sorkar Karnataka ban shna ïa ka Meghalaya House hynrei da ka jingïai buddien jong ka Sorkar Meghalaya shen yn sa shna noh ïa ka Meghalaya House bad ong ruh ba ka Sorkar ka la khot ruh ka Expression of Interest (EOI) khnang ban pynsdang noh ïa kane ka ing basa ha ka nongbah Bengalore.
“Ngi ngeit skhem lyngba ka jingdon jong ka Meghalaya House ha Bengalore kan ai jingmyntoi ïa ki samla kiba pule bad kiba trei sha ka jylla Karnataka bad kumjuh ruh ïa ki paidbah kiba leit wad jingsumar,” la ong u Samla Amos.
Ka seng ka la pynsngew ruh hakhmat u Myntri ha kaba ïadei bad ki Agency kiba treikam hapoh ka jylla Meghalaya kiba ju wad ïa ki khynnah Khasi ban leit pule shabar ka jylla.
“Bun hi na ki Agency haba ki ai Counselling na Shillong ki leh da kawei ka rukom hynrei ynda ki khynnah Khasi ki la poi sha Bangalore ka long pat da kumwei ha kaba bun ki khep ki khynnah Khasi ki ïakynduh jingeh bha halor kane,” ula ong.
U la ïathuh ba u Rakkam A. Sangma uba peit ruh ruh ïa ka tnat Pule Puthi u la kular ban shimkhia ban buh da ki kyndon kiba biang ïa kino kino ki Agency kiba shimti ban phah ïa ki khynnah Khasi ban leit pule sha bar ka jylla nangne shakhmat.
