Shillong, Jymmang 27: Uwei u samla na ka shnong Japorigog jong ka jyla Assam ia uba la tip kyrteng kum u Ranjit Das u la duhei ia la ka jong ka jingim hadien ba u la ngam jyllop katba u dang jngi ha wah Umtrew kaba don ha ka thain Byrnihat, Ri Bhoi District. Kane ka la jia ha ka 26 tarik, Jymmang, 2024 ha ka por kumba 5:00 baje haduh 6:00 baje janmiet.
Ka thymmei khubor ba la iohlum ka la iathuh ba une u samla u la leit kai sha wah Umtrew bad la ki paralok namarba ka dei ruh ka sngi U Blei ha kaba ki nongjngohkai pyrthei ki ju smat bha ban leit leit jngi ha kane ka wah.
Ka jingngam jyllop jong une u samla ka la jia katba u dang jngi bad la ki paralok hynrei syndet syndet ha ka por kumba 5:00 baje eiei haduh 6:00 baje janmiet ka um ka la kiew kynsan bad une u samla lem bad ki paralok ki la pyrshang ban mih noh napoh ka wah hynrei ha kum kane ka por u Ranjit Das um shym la lah satia ban poi sha ryngkew tad haduh ba un da khlad noh watla ki paralok ki la pyrshang ban iarap pyllait im ia u.
Tang shu ioh jingtip halor kane ka jingjia, ki Pulit ka Byrnihat Police Outpost bad ki bor Pulit ka Search and Rescue Team ki la leit bran bran sha wah Umtrew hynrei namar ka jingdum jong ka miet kim shym la lah satia ban sei ia ka met.
Ia ka met jong une u samla, la ioh ban sei ha ka Lah Sngi u Blei ha ka por kumba 11:00 baje mynstep ka kynhun jong ka SRT ka la ioh ban sei ia ka met jong u Ranjit Das bad pynkit noh sha Nongpoh Civil Hospital na ka bynta ban leh ia ka post-mortem.
Ha kaba iadei bad kane ka jingjia, ki Pulit ki la pynlong ia ka jingtohkit kaba bniah.
