Shillong, Rymphang, 6: U Myntri Rangbah ka Jylla Conrad K Sangma, ha ka sngi Baar u la sam ia ki shithi thungkam sha ki 346 ngut ki nonghikai skul Lower Primary ha ka jingialang kaba la long ha State Convention Centre, Shillong ryngkat ka jingsakhi lang jong u Myntri ka tnat Pule Puthi u Rakkam A. Sangma.
Haba kren kum u kongsan, u Conrad Sangma u la ong ba ka jingpynlong ia kane ka jingialang kam dei eh tang ban sam ia ki shithi thungkam sha ki nonghikai ba la thung thymmai ban hikai ha ki Lower Primary School hynrei ka long ruh ban iamir jingmut bad ban pyntip ia ki thong jong ka Sorkar.
“Mynta ngi long kum kawei ka kynhun, ngi lah ban leh ia ki jaitkam bapher bapher ha ki kyrdan bapher bapher hynrei ngi don hangne ban kynjoh ia ka thong ka ban ialam ia ka jylla shakhmat,” u la ong.
U la ong ba ka jingbhah pisa jong ka Sorkar sha ka tnat Pule Puthi ka long kaba heh.
Shuh shuh u Myntri Rangbah u la kyntu ia ki nonghikai ba thymmai ba kin sdang noh ia la ka jong ka kamram da ka jingmut jingpyrkhat kaba dei namarba kum ki nonghikai kam dei eh tang ba kin ai jingnang jingstad hynrei ki dei ban long ki nongpynkylla dur ia ka jingim jong ki khynnah hapoh ka jingpeit ka jong ki.
“Ngi la tei ia k iing skul bad ki jingdonkam hynrei ka jinghikai kaba phin ai bad ba phin tei ia ka lawei jong ka jylla bad ia ka ri phi dei ban long kiba nyngkong eh ban long ki nongwanrah jingkylla,” u la ong
U Myntri ka tnat Pule Puthi, Rakkam A. Sangma haba kren ha kane ka sngi u la ong, ka kam hikai skul ka dei kaba donburom tam. “Haba phi pyndep ia la ka jong ka kamram da ka jingaiti lut bad ka jinglen lade phi don ruh ka bor ban wanrah ia ka jingkylla namarkata ngi phah ia phi da ka jingsngew skhem ba phin ia ka jingkitkhlieh da ka jingiatreilang bad ka sorkar,” la ong u Myntri.
U Myntri u la maham ruh ia kito kiba aiwai pateng ia ka kam hikai skul sha kiwei pat namarba ka ktah ia ka pule puthi jong ki khynnah skul bad ka pyntroiñ noh ia ka jingkordor ka pule ka puthi.
U Myntri Rangbah bad kiwei kiwei ki kynrem ki lyndan ki la pyllait paidbah ruh ia ki tiar ai jinghikai ba la tip kum ki Jadui Pitara for pre-schoolers.
Kumba 35,000 ngut ki khynnah skul kin sa ioh pyndonkam ia kine ki tiar lyngba ki nonghikai jong ki skul Lower Primary tang shu la sdang skul ban sa pyndonkam baroh shisnem. Ki tiar ki kynthup ia ki Activity Sheet, Worksheet, Flashcard, Poster, Game Board bad kiwei kiwei.
