Shillong, Rymphang, 6: U MLA jong ka Pynthorumkhrah Constituency Bah Alexander L. Hek uba long ruh u Myntri ka Sorkar Jylla ha ka 2 tarik mynta u bnai u la leit jurip ia ka shnong Pynthorbah na ka ban ban pynbna ia ki surok, ki lynti ki syngkien bad ia ki lynti iaid kjat.
Ia u MLA, la synran lang da u Executive Engineer ka tnat PWD (Roads) Shillong Central Division, Shillong u Bah Jowel Marbaninag, ka Asst. Executive Engineer Kong Anumanda Sumer, u Joint Engineer Bah Don Swer, u Rangbah Shnong ka Pynthorbah Bah Syrpai Marbaniang bad ki nongkitkam jong ka shnong Pynthorbah
U Bah AL Hek u la Kular ban wanrah ia ki kam pynroi na ka bynta ban pynbha bad ban pynitynnat ia ka shnong Pynthorbah khnang ba kan long ka jingkyrkhu ia ki paidbah jong ka shnong Pynthorbah.
Nalor ki kam ba ladep ban pyntrei, ba kynthup ia ki surok, ki lynti ki syngkien, ki nala bad ki lynti iaid kjat ki don ruh shibun ki kam kiba u Bah AL Hek ha ka jinglong nongmihkhmat u la wanrah hapoh ki shnong bapher bapher jong ka Pynthorumkhrah Constituency.
U Bah Hek u la kyrpad ruh ia ki paidbah ba kin long kiba iaishah hapdeng ka jingpyntrei bad ka jingpynbha ia ki surok bad ki lynti ki syngkien hapoh ka shnong namarba kin don ki jingwit ha ka leit ka wan bad ka iaid ka ieng jong ki paidbah bad ia ki kali.
