Shillong, Rymphang, 6: Hadien ka jingwad ba khlem shongthait haduh saw sngi lynter, ki nongtrei jong ka Shillong Municipal Board (SMB) bad ka kynhun State Disaster Response Force (SDRF) ka Directorate of Civil Defence & Home Guards Meghalaya, Shillong ha ka sngi Baar ki la lap ia ka met jong u Bah Marshall Marweiñ uba la shah tep im ha ka jingtwa ka synrum jaboh ha Marten ha ka sngi Saitjaiñ jong ka taiew baladep.
Ka jinglap ia ka met iap u Bah Marshall Marwein la antad ba ka dei ha ka por kumba 4:20 baje janmiet hadien ba ka kynhun SDRF, ki nongtrei ka Shillong Municipal Board bad ki katto katne ki riewpaidbah ki la wad ia ka met jong u Bah Marshall khlem shongthait.
Ka Kong Thilda Lyngdoh Mawphlang kaba dei ka Hynmen Kynsi jong u Bah Marshall Marweiñ ka la iathuh ba ka la leit ban phah duwai ha u Pastor Byrwa uba la pynduwai kyrpang bad uba la ai jingkyrmen ia ka kum ka ing ka sem ba u Blei un sa plie lad plie lynti ba yn sa lap biang ia ka met jong u Bah Marshall.
Ha ka jingiakren bad ki lad pathai khubor, ka kiaw kurim jong u Bah Marshall ka la ong iathuh ba dei ki kynthei kiba la iarap ban wad lang ia ka met jong u Bah Marshall kiba la lap shwa ia ka khoh kaba syriem ia ka khoh kaba une u rangbah ju pyndonkam ban thep ia ki mar jot bad ia u proh. Hadien kane, ki la lap pat sa ia ka met jong u ryngkat ka jingiatreilang bad nongtrei ka Municipal bad ka kynhun State Disaster Response Force.
Ka la iathuh ruh ba ka jingleit ontep ia ka met ba dang sah jong u Bah Marshall kan sa long ha ka sngi Balang namar ka jingkyrpad jong ki Kur ban buh mynta shimiet ia ka met.
Haba kylli, ka la ong ruh ba kum ka ing ka sem kim kwah shuh ban dang phah leh ia ka Post Mortem namarba u Bah Marshall u la duhei ia la ka jong ka jingim na ka jingtwa ka synrum jaboh ym na kiwei kiwei pat ki daw.
U Chief Executive Officer (CEO) ka Shillong Municipal Board (SMB) PK Boro u la ai khulei ia ki nongtrei jong ka Municipal, ia ka kynhun SDRF bad ia ki riewpaidbah kiba la trei shitom ban wad ia ka met jong u Bah Marshall naduh ka sngi Saitjaiñ tad haduh ban da lap mynta ka sngi.
