Shillong, Rymphang, 12: U Myntri Khynnah ka Sorkar Pdeng uba khmih ia ka tnat Pule Puthi u Dr Subhas Sarkar ha ka lah sngi U Blei u la aiti ia ki shithi thungkam sha ki 48 ngut ki nongshong shnong ka jylla Meghalaya kiba la shah thungkam ha ki ophis treikam jong ka Sorkar Pdeng ha kane ka jylla Meghalaya.
Ia kine ki shithi thungkam la aiti sha ki nongthep kam ha North Eastern Hill University, ha North Eastern Police Academy, ha Employees Provident Fund Organisation, ha North Eastern Electric Power Corporation Limited , ha North Eastern Indira Gandhi Regional Institute of Health & Medical Science bad ha Department of Post.
Haba pynpaw ia ka jingkmen halor ka jingjop jong ka Rozgar Mela, u Sarkar u la ong ba kane ka dei ka sienjam ba la shim da u Myntri Rangbahduh ka ri u Narendra Modi ban plie ia ki lad aikam sha ki samla bad ban pynthikna ia ka bha ka miat jong ki nongshong shnong.
Ka samla Natasha Manar na Meghalaya ha ka jingiakren bad u Myntri Khynnah ka la pynpaw ia ka jingsngewnguh ia u Modi bad pynpaw ruh ka jingkyrmen ba kane ka thain kan nang ioh shuh shuh ia ki lad bad ki jingiarap na ka Sorkar Pdeng ha ki sngi ban dang wan bad ka la kyntu ia ki para samla na kane ka jylla Meghalaya ban aplai ia ki kam kiba lait ha ki tnat treikam ka Sorkar Pdeng.
Ka Samla Natasa ka la ioh ia ka shithi thungkam ha NEIGRIHMS.
