Shillong, Rymphang, 12: Ka Khasi Students Union (KSU) War Jaiñtia Circle ha ka Lah Sngi U Blei ka la ujor ha u Sub-Divisional Officer (SDO) ka Amlarem Civil Subdivision halor ka jingleh donbor jong ki shipai BSF langrut ia u Officer Incharge jong ka Muktapur Veterinary Dispensary u Dr. Seiboklang Buam, kaba la jia ha ka sngi u Blei katba u dang thmu ban leit khwai dohkha ha wah Lakroh.
Ka seng ka la phah ruh ia ka kopi jingujor sha u Deputy Commissioner jong ka West Jaiñtia Hills u Bah BS Sohliya, sha u Chairperson jong ka Meghalaya Human Rights Commission (MHRC), sha u 2nd-in-command BSF bad sha u Myntri ka tnat Kam Pohing ka Sorkar Jylla u Bah Prestone Tynsong ba kin tuklar halor kane ka jingjia bad ba pynshitom ia ki arngut ki shipai BSF kiba donkti ha ka kam thombor ia ka longryngieng jong u Dr. Buam.
Ha ka ujor, ka seng ka la ong, ‘kane kam dei shuh ka jingjia banyngkong. Ki shipai BSF jong ka 4th Battalion ki ju donkti ban pyndik ia ki nongleit iew leit hat bad ia ki nongrep. Ki ju pakhang ia ka surok bad talasi naphang ia ki kali kit mar bad ki don ruh ki khep ba wat ki mar ki mata ki shu jah rngai. Hadien ba la pynhap ia ki mar ki mata na ki kali, ki ieh beit hangto ba ki trai kin kyntiew biang ia ki mar ha kali bad kane ka ju wanrah ia ka jingduhnong kaba khraw ia ki paidbah.”
“Kum ka seng, ngim lah shah shuh ia ki kam pyntriem pyrshah ia ki briew jong ngi, da kita ki briew kiba shah bynshet ban ai jingiada. Ngi kyntu ia phi ban shimkhia halor kane ka jingjia bad ban pynshitom ia kiba donkti halor kane ka kam khnang ba kum kine kijuh ki jingjia, kin ym jia shuh hadien habud,” la ong ka seng ha ka dorkhas.
